«Սիրելի՛ ժողովուրդ, Հայաստանի Հանրապետութեան սիրելի՛ քաղաքացիներ,

Այսօր մենք ոգեկոչում ենք Մեծ եղեռնի՝ Հայոց ցեղասպանութեան անմեղ զոհերի յիշատակը, ովքեր զոհ գնացին 1915 թուականից ահագնացած կոտորածներին եւ զանգուածային տեղահանութիւններին։

Օսմանեան կայսրութեան գոյութեան վերջին շրջանում տեղի ունեցած այդ իրադարձութիւնները խորը հետք են թողել իւրաքանչիւր հայի հոգու եւ գիտակցութեան մէջ, Հայաստանի շատ քաղաքացիների համար ցեղասպանութիւնը ոչ միայն ազգային, այլեւ ընտանեկան, անձնական ողբերգութիւն է։

Այս ողբերգութիւնը վերապրելը վերջին աւելի քան մէկդարեայ մեր ազգային օրակարգի առանցքային հարցերից է, անկախ նրանից, թէ որքանով է ձեւակերպուած եղել որպէս այդպիսին։

Այս օրակարգի շուրջ կառավարութեան եւ անձամբ իմ մտորումներն ու մտածումները յանգում են հետեւեալին․ զարգացած, ինքնիշխան, անվտանգ, այսինքն՝ զատուած եւ գծուած սահմաններով Հայաստանի Հանրապետութիւնն է Մեծ Եղեռնի ողբերգութիւնը վերապրելու միջոցը, մեր ժողովրդի բոլոր զոհողութիւններին եւ զոհերին մեր հաւատարմութեան առհաւատչեան։

Պետութիւն եւ պետական շահեր, Հայաստանի Հանրապետութիւն՝ միջազգայնօրէն ճանաչուած տարածքով, հարեւանների հետ կարգաւորուած յարաբերութիւններով, բաց սահմաններով, խաղաղութիւն, աշխատանք, բարեկեցութիւն, ազատ եւ պաշտպանուած քաղաքացի․ ահա թէ ինչը, ովքեր եւ ինչպէս պիտի վառ պահեն Մեծ եղեռնի զոհերի յիշատակը, ահա թէ ինչպէս պէտք է վերապրենք Մեծ եղեռնի ողբերգութիւնը։

Սիրելի՛ ժողովուրդ, Հայաստանի Հանրապետութեան սիրելի՛ քաղաքացիներ,

Մենք գնում ենք այս ճանապարհով, որովհետեւ այսպէս ենք վերծանում այն ուղերձը, որ մեզ յղում է պատմութիւնը, այսպէս ենք վերծանում ձեզնից իւրաքանչիւրի, ՀՀ իւրաքանչիւր քաղաքացու սրտի տրոփիւնը, որ չի հեռարձակւում ոչ մի հեռուստատեսութեամբ, չի արտայայտւում ոչ մի ընկերային ցանցում, բայց լսելի է ձեր քուէով Հայաստանի Հանրապետութիւնում ձեւաւորուած կառավարող մեծամասնութեանը, լսելի է անձամբ ինձ։

Այս ճանապարհով գնալը լաւատեսութեան կամ յոռետեսութեան հարց չէ, այլ առաքելութեան, ապահովելու Հայաստանի Հանրապետութեան, մեր հայրենիք–պետութեան յարատեւութիւնը, եւ անցնելով դաժան փորձութիւնների ու ողբերգութիւնների միջով՝ մենք վաստակել ենք այդ հնարաւորութիւնը եւ այդ հնարաւորութիւնը բաց պիտի չթողնուի։ Ու համոզուած եմ, մենք՝ ժողովուրդն ու նրա ընտրած կառավարող կազմը, բաց չենք թողնի այս հնարաւորութիւնը յանուն մեր նահատակների եւ յանուն մեր սերունդների։

Փա՛ռք նահատակներին եւ կեցցէ՛ Հայաստանի Հանրապետութիւնը»։