Երեւանի մէջ բացուեցաւ COP17-ի ղեկավարներու վեհաժողովը
Երեւանի մէջ այսօր՝ Հոկտեմբեր 16-ին, իր աշխատանքներուն սկսաւ Կենսաբազմազանութեան մասին ՄԱԿ-ի համաձայնագրի մասնակից երկիրներու 17-րդ համաժողովին (COP17) ընդառաջ կազմակերպուած ղեկավարներու վեհաժողովը, որուն մասնակցելու համար Հայաստան ժամանած են բազմաթիւ երկիրներու ղեկավարներ եւ բարձրաստիճան պաշտօնատարներ։
Վեհաժողովին ներկայ են աւելի քան տասնեակ մը երկիրներու ղեկավարներ, որոնց շարքին՝ Իրանի նախագահ Մասուտ Փեզեշքեան, Ղազախստանի նախագահ Քասըմ-Ժոմարթ Թոքաեւ, Վրաստանի վարչապետ Իրաքլի Քոպախիծէ, ինչպէս նաեւ Կեդրոնական Ասիոյ եւ Ափրիկէի շարք մը երկիրներու առաջնորդներ։ Վեհաժողովին կը մասնակցի նաեւ ՄԱԿ-ի ընդհանուր քարտուղար Անթոնիօ Կութերէշ։
Թուրքիան ներկայացուած է Երկրագործութեան նախարարի մակարդակով։ Հայաստանի Արտաքին գործոց փոխնախարար Ռոբերտ Աբիսողոմոնեանի համաձայն, թուրք նախարարը հանդիպումներ պիտի ունենայ վեհաժողովին մասնակցող ղեկավարներու հետ։
Իրանի նախագահին ընկերակցող պատուիրակութեան մաս կը կազմէ նաեւ Արտաքին գործոց նախարար Ապպաս Արաղչի, որ սակայն չէ պատասխանած լրագրողներու հարցումներուն։
Վեհաժողովին լիագումար նիստը բանալով՝ Հայաստանի վարչապետ Նիկոլ Փաշինեան անդրադարձած է երկրին համար կենսաբազմազանութեան կենսական նշանակութեան՝ յիշեցնելով 1990-ականներու տնտեսական ծանր տարիները, երբ Սեւանայ լիճին ձկնապաշարները կարեւոր դեր ունեցած էին բնակչութեան սնունդի ապահովման մէջ։
“1990-ականներու սկիզբը, երբ ներածման եւ արտադրութեան շղթաները խզուած էին, եւ Հայաստանի մէջ առօրեայ սնունդի խնդիր կար, Սեւանայ լիճին ձկնապաշարները օգնութեան հասան մեզի։ Առանց չափազանցութեան՝ քանի մը տարի Սեւանի սիգը Հայաստանի բնակչութիւնը սնուցանող գլխաւոր մթերքը եղած է, ինչ որ, իր կարգին, սպառման եզրին հասցուցած էր լիճին ձկնապաշարները”,– ըսած է Փաշինեան։
Իր կարգին, Իրանի նախագահ Մասուտ Փեզեշքեան իր ելոյթին մէջ անդրադարձած է տարածաշրջանի զինուորական գործողութիւններուն բնապահական հետեւանքներուն։ Ան յայտարարած է, թէ Միացեալ Նահանգներու եւ իր բնորոշումով՝ «սիոնական վարչակարգ»-ին նախաձեռնած պատերազմը լուրջ սպառնալիք կը ներկայացնէ բնապահական համակարգերուն՝ ուժանիւթի արտադրութեան կայաններու կործանման, հրդեհներու եւ ապականող նիւթերու արտանետման հետեւանքով։
“Ասիկա զուտ ներքին խնդիր մը չէ, որ սահմանափակուի մէկ երկրի սահմաններով. բնութիւնը քաղաքական սահմաններ չի ճանչնար”,– շեշտած է Իրանի նախագահը։
Կենսաբազմազանութեան մասին ՄԱԿ-ի համաձայնագիրը բնապահութեան վերաբերող երեք գլխաւոր միջազգային համաձայնագրերէն մէկն է։ Անոր նպատակն է նպաստել կենսաբազմազանութեան պահպանման ու վերականգնման, ինչպէս նաեւ բնութեան պաշարներու կայուն օգտագործման ուղղութեամբ միջազգային ջանքերուն։
Համաձայնագրի մասնակից երկիրներուն համաժողովը կը գումարուի երկու տարին անգամ մը։
