Երեւանի «Յաղթանակ» զբօսայգիին մէջ Ալբերտ Յովհաննիսեանի եւ նահատակուած միւս զինուորներու յիշատակին նուիրուած յուշավայր պիտի ստեղծուի
Երեւանի քաղաքապետ Տիգրան Աւինեան նախաձեռնութիւնը քննարկած է 44-օրեայ պատերազմի ընթացքին նահատակուած Ալբերտ Յովհաննիսեանի հօր՝ Արտակ Յովհաննիսեանի հետ։ Յուշավայրին համար առաջարկուած վայրը արժանացած է վերջինիս հաւանութեան։
Երեւանի «Յաղթանակ» զբօսայգիին մէջ կը նախատեսուի ստեղծել յուշավայր մը՝ նուիրուած Արցախի 44-օրեայ պատերազմին նահատակուած Ալբերտ Յովհաննիսեանի եւ հայրենիքի պաշտպանութեան համար իրենց կեանքը զոհած միւս զինուորներուն յիշատակին։
Այս մասին Նոյեմբեր 19-ին յայտնած է Երեւանի քաղաքապետ Տիգրան Աւինեան՝ Ալբերտ Յովհաննիսեանի հօր՝ Արտակ Յովհաննիսեանի հետ ունեցած հանդիպումէն ետք։
Քաղաքապետին համաձայն՝ հանդիպման ընթացքին քննարկուած է յուշավայրին ստեղծման նախաձեռնութիւնը, իսկ անոր համար առաջարկուած վայրը արժանացած է նահատակուած զինուորին հօր հաւանութեան։
Ներկայիս կը մշակուին յուշավայրին նախագիծերը, որոնք պիտի ներկայացուին Յովհաննիսեանի ընտանիքին՝ անոր կարծիքն ու հաւանութիւնը ստանալու համար։
Աւինեան շեշտած է, որ աշխատանքները պէտք է կատարուին նահատակուած զինուորներու ընտանիքներուն հետ խորհրդակցաբար՝ նկատի առնելով անոնց կարծիքներն ու ցանկութիւնները։
Ալբերտ Յովհաննիսեանի պատկերի հեռացման շուրջ վէճը
Յուշավայրին ստեղծման նախաձեռնութիւնը կը յաջորդէ «Յաղթանակ» զբօսայգիի գլխաւոր մուտքին մօտ գտնուող պատէն Ալբերտ Յովհաննիսեանի մեծադիր պատկերի հեռացման շուրջ ծագած դժգոհութիւններուն։
2026 Սեպտեմբերին պատկերին հեռացումը քննադատութիւններու առիթ տուած էր հանրութեան եւ ընկերային ցանցերուն մէջ։
Երեւանի քաղաքապետարանը բացատրած էր, որ պատը մաքրուած էր նորոգութեան աշխատանքներու նախապատրաստութեան համար, եւ հերոսին պատկերը հեռացնելու առանձին նպատակ չէր հետապնդուած։
Սակայն Ալբերտի հայրը դժգոհութիւն յայտնած էր, որ իր որդիին պատկերը հեռացնելու որոշումը առնուած էր առանց ընտանիքին հետ նախապէս խորհրդակցելու։
Ան յայտնած էր, որ պատկերի հեռացման մասին տեղեկացած է լրասփիւռներէն՝ շեշտելով, որ նահատակուած զինուորներուն նուիրուած յուշապատկերներուն վերաբերող որեւէ փոփոխութիւն պէտք է նախ քննարկուի անոնց հարազատներուն հետ։
Այդ օրերուն արդէն քննարկուած էին Ալբերտի յիշատակը նոյն վայրին մէջ պահպանելու տարբեր կարելիութիւններ, ներառեալ նոր մեծադիր պատկեր մը կամ քանդակ մը տեղադրելու առաջարկները։
44-օրեայ պատերազմի խորհրդանիշերէն մէկը
Ալբերտ Յովհաննիսեան 19 տարեկան էր, երբ 2020 Հոկտեմբեր 8-ին նահատակուեցաւ Արցախի 44-օրեայ պատերազմի ընթացքին։
Ան կը ծառայէր Արցախի պաշտպանութեան բանակի հրետանային ստորաբաժանումներէն մէկուն մէջ՝ կրտսեր ենթասպայի աստիճանով։
Պատերազմի առաջին օրերուն լայն տարածում գտած էր լուսանկար մը, որուն մէջ Ալբերտ պատկերուած էր մարտական դիրքի վրայ՝ հրետանային թնդանօթէն կրակ արձակելու պահուն։
Այդ լուսանկարը տարածուած էր միջազգային մամուլին մէջ եւ դարձած հայ զինուորներու պայքարին ու դիմադրութեան խորհրդանիշերէն մէկը։
2021 Հոկտեմբերին Ալբերտ Յովհաննիսեանին յետմահու շնորհուած էր «Արցախի հերոս» բարձրագոյն կոչումը։ Անոր «Ոսկէ արծիւ» շքանշանը յանձնուած էր հօրը՝ Արտակ Յովհաննիսեանին։
«Յաղթանակ» զբօսայգիին մէջ նախատեսուող յուշավայրին վերջնական տեսքն ու կառուցման ժամանակացոյցը տակաւին չեն հրապարակուած։

