«Խիստ անընդունելի է Ազերպայճանի այդ յարձակողական կեցուածքը, որով կը հարուածէ մեր կենսական իրաւունքներն ու շահերը»
«Սիրելի՛ հայրենակիցներ,
Ադրբեջանական կողմն արդէն երկրորդ անգամ փակել է Արցախը Հայաստանին եւ աշխարհին կապող միակ մայրուղին՝ կեղծ ու մտացածին պատճառաբանութիւններով:
Նախ, մեզ համար խիստ անընդունելի է Ադրբեջանի այդ յարձակողական վարքը, որի միջոցով ահաբեկում է մեր բնակչութիւնը եւ հարուածի տակ դնում մեր կենսական իրաւունքներն ու շահերը: Սա աննախադէպ մարտահրաւէր է մեր պետութեան ու ժողովրդի համար։ Ես կոչ եմ անում ողջ հասարակութեանը համախմբուել ու հանգստութիւն ցուցաբերել, քանի որ Ադրբեջանի իշխանութիւնների նպատակներից մէկն էլ Արցախում ներքին պառակտման ու խուճապի հրահրումն է:
Արցախի իշխանութիւններն ու ժողովուրդն ունեն յստակ արժէքներ, սկզբունքներ ու կարմիր գծեր, որոնց պաշտպանութեան ուղղութեամբ գործադրում ենք եւ կը գործադրենք բոլոր հնարաւոր ջանքերը՝ երբեմն ոչ-տեսանելի:
Համոզուած ենք, որ ռուսական խաղաղապահ զօրակազմը, որպէս մեր ժողովրդի ու ճանապարհի անվտանգութեան երաշխաւոր, կը կիրառի բոլոր գործիքակազմերը՝ կանխելու նման սադրանքները եւ համաձայնութիւնների խախտումները՝ ուղղուած մեր ժողովրդի կենսական իրաւունքների ու շահերի դէմ:
Կարեւոր անելիքներ ունեն նաեւ միջազգային հանրութեան այլ դերակատարները, քանի որ ադրբեջանական կողմի գործողութիւնները կոպտօրէն խախտում են միջազգային իրաւունքի հանրայայտ չափանիշերը, եւ Ադրբեջանը ձգտում է Արցախի բնակչութեան ցեղային զտման ու հայրենազրկման:
Արցախը եղել է եւ կը լինի հայկական՝ մեր միասնական ու վճռական ջանքերի միջոցով՝ ի հեճուկս բոլոր մարտահրաւէրների»:
