Արցախցի Յովիկ Սարդարեան՝ «Երաժշտութեան Նոպէլեան մրցանակ»-ի դափնեկիր

Արմատներով Արցախէն՝ հայ երաժշտահան Յովիկ Սարդարեան դարձած է Էռնսթ ֆոն Զիմենսի (Ernst von Siemens) 2026-ի մրցանակի դափնեկիր։ Սա ժամանակակից ակադեմական երաժշտութեան ոլորտի ամենահեղինակաւոր մրցանակներէն մէկն է, որ յաճախ կը կոչեն «Երաժշտութեան Նոպէլեան մրցանակ»։

Միջազգային այս բարձր գնահատականը ճանաչումն է ոչ միայն երաժշտահանին անհատական տաղանդին, այլեւ՝ ժամանակակից հայկական երաժշտական դպրոցի կենսունակութեան, որուն արմատները Արցախի մէջ են։

Յովիկ Սարդարեան 32 տարեկան է, ծնած է Հադրութ (Արցախ)։ Անոր երաժշտական կրթութեան առաջին փուլը անցած է Ստեփանակերտի «Սայեաթ-Նովա» երաժշտական ուսումնարանին, այնուհետեւ՝ Երեւանի Պետական երաժշտանոցին մէջ։ Ան առաջին հայ երաժշտահանն է, որ կ՚արժանանայ այս բարձրագոյն միջազգային մրցանակին։