Հանգիստ՝ Տաթեւ արք. Սարգիսեանի
Փետրուար 20-ին, յետ երկարատեւ հիւանդութեան՝ Հայաստանի մէջ 85 տարեկանին վախճանած է Մեծի Տանն Կիլիկիոյ կաթողիկոսութեան երիցագոյն միաբաններէն Տաթեւ արքեպիսկոպոս Սարգիսեանը։
Ծնած է 1941-ին, Հալէպ։ 1995-ին տեղափոխուած է Հայաստան, վարչական եւ մանկավարժական պաշտօններ ստանձնելու Մայր Աթոռ Սուրբ Էջմիածնի մէջ:
Վախճանեալ սրբազանին թարմ յիշատակին յարգանքի խոնարհ տուրք կը մատուցէ Լեւոն Շառոյեան, հետեւեալ տողերով.
ՅԻՇԵԼՈՎ ՏԱԹԵՒ ՍՐԲԱԶԱՆԸ…
Իր վախճանման լուրը գուժեցին Ս. Էջմիածնէն, այսօր, քանի որ Տաթեւ սրբազան շուրջ երեք տասնամեակէ ի վեր վերջնապէս կայք հաստատած էր ի Մայր Աթոռ, առանց որ հրաժարած ըլլար Կիլիկեան միաբանութենէն, որուն ծառայած էր իր երիտասարդական տարիներուն։ Իբրեւ թեմակալ առաջնորդ` պաշտօնավարած էր Հալէպ ու Լոս Անճըլըս։ Եղած էր նաեւ Դպրեվանքի տեսուչ։
Տաթեւ սրբազան, որ հօրեղբօրորդին էր երջանկայիշատակ Գարեգին Ա. Ամենայն Հայոց կաթողիկոսին, Բերիոյ թեմի գաւազանագրքին մէջ իր անունը արձանագրեց 9 տարուան շրջանի մը վրայ, 1968-1977, յաջորդելով Ղեւոնդ արք. Չէպէեանին ու կանխելով Սուրէն արք. Գաթարոյեանը։
Հալէպի երէց ու միջին սերունդը առ այսօր կը յիշէ զինք։ Մեղմ ու հանդարտաբարոյ նկարագիր մը ունէր, դէմքին` թեթեւ ժպիտ մը։
Կը յիշեմ իր եպիսկոպոսական փառաւոր պատարագները Հալէպի Քառասուն Մանկանց տաճարին մէջ, Ս. Ծննդեան կամ Յարութեան տօներուն առիթով։ Կը յիշեմ իր տպաւորիչ քարոզները։ Կը յիշեմ իր Ոտնլուաները`մինչեւ եկեղեցւոյ բեմին եզերքը խռնուած անանցանելի բազմութիւններու ներկայութեան, մինչ վերնատունէն` տիկ. Ժիւլիէթ Հարպոյեան կը թնդացնէր տաճարին որմերը` իր հոգեցունց «Սուրբ, սուրբ»-երով…։
Յիշատակը` անթառամ։ Խունկ եւ աղօթք։
Լ. Շ.
