ՖՐԱՆՍԱ – Խորհրդաւոր խորհրդաժողով մը

Բոլորո­վին դի­պուա­ծով, անուղղա­կի ճամ­բով տե­ղեկա­ցանք, թէ Փա­րիզի մէջ, Ապ­րիլ 11-12-ին տե­ղի պի­տի ու­նե­նայ հաւաք մը, որ կը կրէ «Սփիւռքի ազ­գա­յին զօ­րաշար­ժի խորհրդա­ժողով» ամ­բողջա­կան անուանու­մը։ Լու­րին ծա­նօթա­ցանք Դի­մագիր­քի «ԱՅԲ- Էֆ.Էմ.»-ի էջէն։

Ինչպէս նշած ենք լրատ­ւութեան խո­րագ­րին մէջ իսկ, այս նախա­ձեռ­նու­թիւնը օժ­տուած է խորհրդա­ւոր որա­կուե­լու բո­լոր յատ­կա­նիշե­րով։ Նոյնիսկ եթէ զանց առ­նե­նք մեր թերթը նման ծրագ­րի մա­սին որեւէ ձե­ւով չտե­ղեկաց­նե­լու հան­գա­ման­քը (ան­կասկած՝ չենք յաջողած նուաճել կազ­մա­կեր­պիչնե­րու՝ ար­ժե­չափի նուազագոյն նշա­ձողը), կան բազ­մա­թիւ այլ կէ­տեր որոնք լուրջ հար­ցադրումներ կը յա­ռաջաց­նեն։ 

Նախ, ուշագրաւ է նման «կարեւոր» իրադարձութեան մը պաշտօնական յայտարարութիւնը խորհրդաժողովէն հազիւ չորս օր առաջ կատարելու հանգամանքը։ 

Ապա կայ աւե­լի հե­տաքրքրա­կանը։ Յայ­տա­րարու­թեան մէջ ո՛չ մէկ անուն նշո­ւած է. ո՛չ յայտնի է, թէ ով­քե՞ր են կազ­մա­կեր­պիչնե­րը, ո՛չ ալ յայտնի է մաս­նա­կից­նե­րուն ովքեր ըլ­լա­լը: Նոյնպէս՝ չեն հրա­պարա­կուած զե­կու­ցումնե­րու նիւ­թե­րը, նոյ­նիսկ յայտնի չէ, թէ Փա­րիզի ո՞ր վայ­րին մէջ տե­ղի պի­տի ու­նե­նայ խնդրոյ առար­կայ խորհրդա­ժողո­վը։ Չկայ նաեւ որե­ւէ կայ­քէ­ջի յղում, ուրկէ թե­րեւս կա­րենա­յինք քաղել յա­ւելեալ տե­ղեկու­թիւններ. տրա­մադ­րո­ւած է միայն ել-նա­մակի հաս­ցէ մը։

Ստո­րեւ կը ներ­կա­յաց­նենք յայ­տա­րարու­թիւնը՝ նոյ­նութեամբ.

Մամուլի հաղորդագրութիւն

7 Ապրիլ 2026

Փարիզի մէջ Սփիւռքի զօրաշարժի խորհրդաժողով՝ նուիրուած ազգային ներկայ մարտահրաւէրներուն

ՓԱՐԻԶ.- 2026-ի Ապ­րիլ 11-12ին, Փա­րիզի մէջ տե­ղի պի­տի ու­նե­նայ Սփիւռքի զօ­րաշար­ժին նուիրուած խորհրդա­ժողով մը, որ կը մի­տի դի­մագ­րա­ւելու վեր­ջին տա­րինե­րուն հայ­կա­կան աշ­խարհը ցնցած ան­նա­խըն­թաց տագ­նապնե­րը։

2018-էն աս­դին Հա­յաս­տա­նի Հան­րա­պետու­թեան իշ­խա­նու­թիւննե­րուն կող­մէ հայ­կա­կան շա­հերէ հրա­ժարու­մը՝ Ցե­ղաս­պա­նու­թեան եւ Ար­ցա­խի թղթած­րարնե­րէն յետ կանգնի­լը (որուն ար­դիւնքը եղաւ Ար­ցա­խի բռնի հա­յաթա­փու­մը), հայ­կա­կան ինքնու­թեան դէմ ուղղուած սպառ­նա­լիք­նե­րը եւ ազ­գա­յին հաս­տա­տու­թիւննե­րու դէմ կա­տարուող յար­ձա­կումնե­րը ան­նա­խըն­թաց օր­հա­սական իրադ­րութիւն ստեղ­ծած են ամ­բողջ հայ­կա­կան աշ­խարհին հա­մար։

Կա­յանա­լիք խորհրդա­ժողո­վին նպա­տակն է հա­ւաքա­բար քննար­կել իրա­վիճա­կը, զօ­րաշար­ժի են­թարկել Սփիւռքը, որ­պէսզի կա­րելի ըլ­լայ ձե­ւաւո­րել միաս­նա­կան ու նպա­տակաուղղուած կե­ցուածք՝ ի պաշտպա­նու­թիւն եւ հզօ­րացում Հա­յաս­տա­նի պե­տու­թեան, հայ­կա­կան սփիւռքին եւ առ­հա­սարակ հայ­կա­կան շա­հերուն եւ Հայ Դա­տին։

Խորհրդա­ժողո­վը պի­տի հա­մախմբէ աւե­լի քան 25 եր­կիրնե­րէ շուրջ 150 ներ­կա­յացու­ցիչներ, որոնց շար­քին՝ հա­մայնքա­յին առաջ­նորդներ, կազ­մա­կեր­պութեանց պա­տաս­խա­նատու­ներ, հան­րա­յին-քա­ղաքա­կան գոր­ծիչներ, գիտ­նա­կան­ներ, մաս­նա­գէտ­ներ, գոր­ծա­րար­ներ եւ երի­տասարդներ։

Օրա­կար­գի առանցքա­յին կէ­տերն են.

 Սփիւռքի ռազ­մա­վարա­կան դե­րը ազ­գա­յին հիմ­նախնդիր­նե­րու լուծման գոր­ծին մէջ եւ քա­ղաքա­կան օրա­կար­գը։

 Ազ­գա­յին ար­ժէքնե­րու եւ Հայց. Եկե­ղեց­ւոյ կա­րեւո­րու­թիւնը Սփիւռքի մէջ հայ­կա­կան ինքնու­թեան պահ­պանման առու­մով. նոր իրա­վիճա­կի մար­տահրա­ւէր­ներ։

 Հա­յաս­տան-Սփիւռք յա­րաբե­րու­թիւննե­րու հիմ­նա­հար­ցեր եւ հո­րիզոն­ներ, Սփիւռքը իբ­րեւ հայ­կա­կան աշ­խարհի փա­փուկ ու­ժի բա­ղադ­րա­մաս։

 Սփիւռքի զօ­րաշարժ եւ վե­րաշ­խուժա­ցում՝ յա­նուն հա­մահայ­կա­կան նպա­տակ­նե­րու։

Խորհրդա­ժողո­վը պի­տի աւար­տի աշ­խարհաս­փիւռ հա­յու­թեան ուղղուած կոչ-յայ­տա­րարու­թեամբ, որուն պի­տի յա­ջոր­դեն քա­ղաքա­կան, տե­ղեկա­տուա­կան, հա­մայնքա­յին եւ այլ նա­խաձեռ­նութիւններ։

Սփիւռքի զօրաշարժի խորհրդաժողովի համադրող կազմ

diasporaconference2026@gmail.com ■