71 տարուան սպասումէ ետք՝ Արթուր Աւետիսեան կը կրկնէ Ալբերտ Ազարեանի պատմական յաղթանակը
Արթուր Աւետիսեան կերտեց հայկական մարմնամարզութեան պատմութիւնը՝ դառնալով անկախ Հայաստանը ներկայացնող առաջին մարզիկը, որ նուաճեց Եւրոպայի ախոյեանի տիտղոսը օղակներու վրայ:
Աւետիսեան ոսկի մետալ շահեցաւ Զակրէպի մէջ կայացած Մարմնամարզութեան Եւրոպայի ախոյեանութեան՝ ապահովելով 14,400 կէտ։ Ան յաղթեց Իլիա Զայքային՝ հաւասար կէտեր ունենալէ ետք, լրացուցիչ ցուցանիշներով:
Յունաստանէն Ողիմպիական ախոյեան Էլեֆթերիոս Փեթրունիասը նուաճեց պրոնզէ մետալը՝ 14,366 կէտով:
Այս տիտղոսը Աւետիսեանի մեծահասակներու Եւրոպայի ասպարէզին մէջ ամէնէն մեծ նուաճումն է, որ կու գայ ճիշդ մէկ տարի ետք նոյն գործիքին վրայ պրոնզէ մետալ շահելէն ետք: Ան նաեւ տարիներ շարունակ մօտ եղած էր գերագոյն յաղթանակին, նախքան ի վերջոյ հասնիլը Եւրոպայի պատուոյ հարթակի գագաթին:
Հայաստանը երկրորդ մարմնամարզիկ մըն ալ ունէր աւարտական փուլին մէջ. Վահագն Դաւթեանը գրաւեց 5-րդ տեղը՝ 14,000 կէտով: Գերմանիան ներկայացնող հայ մարմնամարզիկ Արթուր Սահակեանը գրաւեց 7-րդ տեղը՝ 13,900 կէտով:
Աւետիսեանէն առաջ, օղակներու վրայ Եւրոպայի ախոյեան դարձած վերջին հայ մարմնամարզիկը առասպելական Ալբերտ Ազարեանն էր, որ այս տիտղոսը նուաճած էր 1955-ին՝ ներկայացնելով Խորհրդային Միութիւնը:
Եօթանասունմէկ տարի ետք, Հայաստանը կրկին ունի Եւրոպայի ախոյեան՝ օղակներու վրայ:
