Պատմական նուաճում. «Արարատ-Արմենիա»-ն մուտք գործեց Եւրոպայի Լիկայի հիմնական փուլ

Հայաստանի ներկայի ախոյեան «Արարատ-Արմենիա» պատմական նուաճում արձանագրեց հայկական ֆութպոլի տարեգրութեան մէջ՝ դառնալով առաջին ակումբը, որ կը նուաճէ Եւրոպայի Լիկայի (Europa League) հիմնական փուլի ուղեգիր։ Օգոստոս 27-ին, անցումային փլէյ-օֆի (play-off) դարձի մրցումին երեւանեան կազմը 1-0 հաշիւով պարտութեան մատնեց ռումանական «Ունիվերսիթաթէա Քրայովա» խումբը։

«Արարատ-Արմենիա»-ի գլխաւոր մարզիչ Մանուէլ Թուլիփա խաղէն ետք տուած ասուլիսին շեշտեց, որ այս յաղթանակը չափազանց կարեւոր է ոչ միայն ակումբին, այլեւ համայն հայկական ֆութպոլին համար՝ աւելցնելով, որ այլեւս պատճառ չկայ հրաժարելու մեծ երազանքներէ, եւ իրենք պիտի շարունակեն հետապնդել նոր նպատակներ: Հայաստանի Ֆութպոլի դաշնակցութեան նախագահ Արմէն Մելիքբէկեան եւս շնորհաւորեց ակումբը՝ այս յաջողութիւնը որակելով նշանակալից ու պատմական ձեռքբերում։

Յաջորդ օր, Մոնաքոյի մէջ տեղի ունեցած վիճակահանութեան՝ յստակացան «Արարատ-Արմենիա»-ի յաջորդ մրցակիցները: Սեպտեմբերի երկրորդ կիսուն սկսող մրցաշարքին հայկական ակումբը Երեւանի մէջ պիտի հիւրընկալէ նետերլանտական «ԱԶ Ալքմաար»-ն ու «N.E.C.»-ը, չեխական «Սփարթա»-ն եւ սլովէնական «Ցելիէ»-ն։ Իսկ արտագնայ մրցումներուն հայկական կազմը պիտի հիւրընկալուի իտալական հռչակաւոր «Ա. Սէ. Միլան»-ի, աւստրիական «Սալցպուրկ»-ի, լեհական «Եակելոնիա»-ի եւ փորթուկալական «Թորրենսէ»-ի դաշտերուն վրայ։