ՀՀ վարչապետ Նիկոլ Փաշինեան հեռաձայնային կապ հաստատած է Իրանի նախագահ Իպրահիմ Ռայիսիի հետ։ Լուրը հաղորդած է ՀՀ կառավարութեան մամլոյ ծառայութիւնը։
Կողմերը քննարկած են հայ-իրանական յարաբերութիւններու զարգացման առնչուող օրակարգային շարք մը հարցեր: Ընդգծուած է տնտեսական կապերու ամրապնդման ուղղուած՝ երկու երկիրներու կառավարութիւններու սերտ համագործակցութեան կարևորութիւնը:
Երկու երկիրներու ղեկավարները անդրադարձած են նաև տարածաշրջանին մէջ տեղի ունեցող գործընթացներուն:
Իրանի նախագահը շնորհաւորած է հայ ժողովուրդի Ամանորը։
Իր կարգին, վարչապետ Փաշինեան շնորհաւորած է Իրանի քրիստոնեաներու Ամանորն ու Սուրբ ծնունդը եւ շնորհակալութիւն յայտնած Իսլամական հանրապետութեան՝ երկրին մէջ Հայութեան ինքնութեան պահպանման համար անհրաժեշտ պայմաններ ստեղծելուն համար:
Իրանի նախագահը վերահաստատած է Իրանի աջակցութիւնը Հայաստանի ինքնիշխան տարածքներու և ճանապարհներու առնչութեամբ` ողջունելով Հայաստան–Ազէրպայճան յարաբերութիւններու ուղղութեամբ բանակցութիւնները։
“Կը յուսանք, որ Հայաստանի եւ Ազէրպայճանի միջև առկայ միւս խնդիրները կը կարգաւորուին խաղաղ ճանապարհով՝ միջազգային սկզբունքներու և օրէնքներու շրջածիրին մէջ, և ականատես կ՚ըլլանք տարածաշրջանային խաղաղութեան, կայունութեան և անվտանգութեան”,– ընդգծած է Ռայիսի։
Վարչապետ Փաշինեանն ալ Իրանի նախագահին տեղեկացուցած է ստեղծուած կացութեան վերաբերեալ բանակցութիւններու ընթացքին մասին:
Յիշեցնենք, թէ Իրանի խորհրդարանի Ազգային անվանգութեան և արտաքին քաղաքականութեան մնայուն յանձնաժողովի անդամ Մահմուտ Ահմատի Բիղաշ ՀՀ Անվտանգութեան խորհուրդի քարտուղար Արմէն Գրիգորեանի հետ հանդիպումին նոյնպէս յայտարարած էր` տարածաշրջանային կայունութիւնը, անվտանգութիւնը, սահմաններու անխախտելիութիւնը Իրանի համար կարմիր գիծեր են, և Թեհրան պիտի չհանդուրժէ շրջանին մէջ որևէ տարածքային փոփոխութեան:
