Նիւ Եորքի Ժամանակակից արուեստի թանգարանին (MoMA) մնայուն պահպանութեան յանձնուած են Սերկէյ Փարաջանովի վերստին տպագրուած երեք կարճ ժապաւէններու («Յակոբ Յովնաթանեան» (Հայաստան, 1967), «Քիևեան որմնանկարներ» (Ուքրաինա, 1966) և «Արաբանախշեր Փիրոսմանիի թեմաներով» (Վրաստան, 1986) օրինակները՝ ապահովելով թանգարանի հաւաքածոյին մէջ փարաջանովեան արուեստի անփոխարինելի ներկայութիւնը։

«Արմէնփրէս»-ի համաձայն՝ Հայաստանի Ազգային սինեմայի կեդրոնէն հաղորդած են, թէ այս առիթով թանգարանը 2022 Յունուար 19-ին և 20-ին՝ The MoMA International Festival of Film Preservation – «To Save and Project» ծրագրի շրջանակին մէջ, արուեստասէր հանրութեան ներկայացուցած է Փարաջանովի բանաստեղծական վաւերագրութեան այդ իւրայատուկ ամբողջութիւնը՝ եռափեղկը:

Նշենք, թէ այս գործը տպագրուած է հինգ օրինակով։ Անոնցմէ մէկը կը պահպանուի Հայաստանի Ազգային սինեմայի կեդրոնին մէջ, իսկ մէկական օրինակներ յանձնուած են՝ Վրաստանին, Ուքրաինային, Փարիզի Փոմփիտու կեդրոնին եւ Նիւ Եորքի ժամանակակից արուեստի թանգարանին։