Ազերպայճանի ԱԳՆ. «Կոչ կ՚ընենք Վրաստանի պատրիարքարանին չհետեւելու Հայ եկեղեցւոյ օրինակին»

«Յաղթող»-ի բարդոյթով արբեցած Պաքուն կարծես այլեւս չի բաւարարուիր սոսկ հայկական պատմամշակութային ժառանգութեան իւրացումով ու ոչնչացումով։ Հայկական գործօնը, որ տասնամեակներ շարունակ Ազերպայճանի ներքին հայատեաց քարոզչութեան գլխաւոր թիրախն էր, այժմ աստիճանաբար կը վերածուի տարածաշրջանային «մահակ»-ի եւ հոգեբանական ճնշման գործիքի։

Վրաց պատրիարքարանին ուղղուած Ազերպայճանի Արտաքին գործոց նախարարութեան (ԱԳՆ) այս կոշտ յայտարարութիւնը, ուր անթաքոյց կերպով կոչ կ՚ըլլայ «չհետեւելու Հայ եկեղեցւոյ օրինակին», ըստ էութեան քօղարկուած սպառնալիք մըն է՝ ուղղուած հարեւան պետութեան։ Պաքուն անուղղակիօրէն կը յուշէ իր դրացիներուն, թէ ի՛նչ կրնայ պատահիլ անոնց, որոնք կը համարձակին պահանջատէր ըլլալ կամ պարզապէս մտահոգուիլ իրենց սրբավայրերով։ Ասիկա ոչ միայն ցոյց կու տայ Ազերպայճանի անհանդուրժող եւ ծաւալապաշտական իրական դէմքը, այլեւ յստակ ահազանգ է, թէ հայոց դէմ կիրարկուած յարձակումը նախադէպ է, որ վաղը կրնայ, ի հարկին, գործադրուիլ նաեւ ուրիշներու դէմ։

Ազերպայճանի Արտաքին գործոց նախարարութիւնը յայտարարութիւն մը հրապարակած է՝ Ազերպայճանի տարածքին գտնուող Քուրմուխի (Կուրմուկ) եկեղեցւոյ վերաբերեալ Վրաց պատրիարքարանին հրապարակած դիրքորոշման առնչութեամբ:

Նախապէս, Վրաց պատրիարքարանը հաղորդագրութիւն մը հրապարակելով նշած էր, որ պատմական Էրեթիի Սուրբ Գէորգ մայր տաճարին մէջ եւ անոր յարակից տարածքին վրայ տարուող աշխատանքները մտահոգիչ են։ «Հակառակ անոր, որ Քուրմուխի մայր տաճարը կը գտնուի Ազերպայճանի տարածքին, անիկա մեր երկրին եւ եկեղեցւոյ պատմական ու հոգեւոր ժառանգութեան կարեւորագոյն յուշարձաններէն մէկն է»,– ըսուած էր յայտարարութեան մէջ։

Ազերպայճանի Արտաքին քաղաքական գերատեսչութիւնը խստօրէն հակադարձած է այս մօտեցումին՝ նշելով, որ Վրաց պատրիարքարանին վերջին յայտարարութիւնը «կը հակասէ Ազերպայճանի եւ Վրաստանի միջեւ առկայ բարեկամական ու բարիդրացիական յարաբերութիւններու ոգիին»։ Պաքու նաեւ աւելցուցած է, որ միաժամանակ անընդունելի է Ազերպայճանի տարածքին գտնուող աշխարհագրական եւ պատմական տեղանունները այլ անուանումներով ներկայացնելը։

«Կրօնական կազմակերպութիւնները պէտք է զերծ մնան այնպիսի դիրքորոշումներէ, որոնք կրնան վնասել դարերու ընթացքին Ազերպայճանի եւ Վրաստանի ժողովուրդներուն միջեւ ձեւաւորուած բարեկամութեան ու բարիդրացիութեան պատմական յարաբերութիւններուն։ Այս առումով՝ մենք կոչ կ՚ընենք Վրաստանի պատրիարքարանին չկրկնօրինակելու Հայ եկեղեցւոյ մօտեցումները եւ չհետեւելու անոր օրինակին», կ՚եզրափակէ ազերպայճանական կողմը։