Հայաստանի տեղեկատուական արհեստագիտութիւններու արտածումները՝ տասնամեակի ընթացքին բազմապատկուած

Հայաստանի տեղեկատուական արհեստագիտութիւններու ոլորտի արտածումները վերջին տասնամեակին կտրուկ աճ արձանագրած են։ Հրապարակուած տուեալներուն համաձայն՝ 2024-ին անոնք հասած են 2,26 միլիառ տոլարի, 2015-ի 250 միլիոն տոլարին դիմաց՝ գրեթէ տասնապատիկ աճ արձանագրելով։

2026-ի առաջին կիսամեակի տուեալներուն հիման վրայ կատարուած կանխատեսումը տեղեկատուական արհեստագիտութիւններու արտածումները կը գնահատէ շուրջ 2,05 միլիառ տոլար, ինչ որ կը համապատասխանէ Հայաստանի ապրանքային արտածումներու շուրջ 28,5 առ հարիւրին։ Սակայն այս թիւը ամբողջ տարուան վերջնական արդիւնքը չէ, այլ միայն՝ առաջին կիսամեակի հիման վրայ կատարուած կանխատեսում։

Միաժամանակ, 2026-ի առաջին կիսամեակին Հայաստանի տեղեկատուական եւ հաղորդակցական արհեստագիտութիւններու ոլորտի եկամուտը հասած է 622,4 միլիառ դրամի՝ նախորդ տարուան նոյն ժամանակաշրջանին համեմատ աճելով 12,1 առ հարիւր։ Անոր մէջ բուն տեղեկատուական արհեստագիտութիւններու բաժինը կազմած է 341,1 միլիառ դրամ՝ 14,3 առ հարիւր աճով։ 

Համեմատութեան համար՝ Հայաստանի ընդհանուր արտածումները 2026-ի առաջին ութ ամիսներուն կազմած են 4,624 միլիառ տոլար, 6,5 առ հարիւր պակաս՝ նախորդ տարուան նոյն ժամանակաշրջանէն։