ԱԶԵՐՊԱՅՃԱՆ — Ալիեւ. «Իրան թող չմոռնայ, թէ ինչպէ՛ս վերջ տուինք հայկական բռնագրաւման»
Ազերպայճանի նախագահ Իլհամ Ալիեւ Մարտ 5-ին Պաքուի մէջ գումարուած Անվտանգութեան խորհուրդի նիստին խստօրէն զգուշացուցած է Իրանը՝ Նախիջեւանի օդակայանին հասցուած հարուածին առնչութեամբ: “Իրան թող չմոռնայ, թէ ինչպէ՛ս մենք վերջ տուինք հայկական բռնագրաւման”,– յայտարարած է ան:
Ալիեւ յայտնած է, որ երկրին զինուած ուժերը՝ Պաշտպանութեան նախարարութիւնը, Պետական սահմանապահ ծառայութիւնը եւ յատուկ նշանակութեան ուժերու միւս բոլոր ստորաբաժանումները բերուած են թիւ մէկ մարտական պատրաստութեան վիճակի։ Ըստ անոր՝ այդ ուժերը «պէտք է պատրաստ ըլլան որեւէ գործողութեան իրականացման»։
“Մենք պիտի պաշտպանենք մեր հողային ամբողջականութիւնը եւ պատրաստ ենք մեր հզօրութիւնը ցուցադրելու որեւէ չարագործ ուժի, ճիշդ այնպէս, ինչպէս վերջ տուինք հայկական բռնագրաւման”,– շարունակած է Ալիեւ՝ սպառնալով. “Այն անպատիւ մարդիկը, որոնք իրականացուցած են այս ահաբեկչական գործողութիւնը, պիտի զղջան։ Անոնք պէտք չէ խաղան մեր համբերութեան հետ։ Ով որ նման բան փորձէ ընել՝ պիտի կործանի «Երկաթէ բռունցք»-ին կողմէ”։
Անվտանգութեան խորհուրդի նիստին Ազերպայճանի նախագահը նաեւ քննադատած է Իրանի պետական լրասփիւռները՝ զանոնք մեղադրելով հակաքարոզչութիւն ծաւալելու եւ Իրանի մէջ ապրող ազերպայճանցիներու վերաբերումը Ազերպայճանի Հանրապետութեան հանդէպ փոխելու փորձերուն մէջ։ “Սա կ՚ըլլար այն պատճառով, որ անոնք շատ լաւ գիտեն, թէ անկախ ազերպայճանական պետութիւնը այսօր յոյսի աղբիւր է Իրանի մէջ ապրող բազմաթիւ ազերպայճանցիներուն համար”,– հաստատած է ան։
Իրան կը պնդէ, թէ չէ հարուածած Ազերպայճանը
Յիշեցնենք, որ Մարտ 5-ի առաւօտեան, Պաքու հաղորդած էր, թէ Իրանի զինուած ուժերը անօդաչու սարքերով հարուածած են Նախիջեւանը, տեղեկութիւն մը, զոր Թեհրան կը հերքէ։
«Իրանի զինուած ուժերը կը հերքեն, թէ Նախիջեւանին հասցուած հարուածներուն ետին կայ Թեհրանը»,– կը հաղորդէ «Ռոյթըրզ» լրատու գործակալութիւնը՝ վկայակոչելով Իրանի պետական լրասփիւռները։
Նախիջեւանի օդակայանին հասցուած հարուածին Իրանի առնչութիւնը կասկածի տակ առած է նաեւ Իսլամական Հանրապետութեան Արտաքին գործոց փոխնախարար Քազեմ Ղարիպապատին։ “Մենք չենք թիրախաւորեր մեր դրացի պետութիւնները։ Նախիջեւանը հարուածելու մասին ես առաջին անգամ ձեզմէ կը լսեմ եւ պէտք է հետաքննեմ, թէ ո՛րն է այս տեղեկատւութեան աղբիւրը”,– ազերպայճանական հեռատեսիլի կայաններէն մէկուն հաղորդման ընթացքին յայտարարած է Իրանի Արտաքին գործոց փոխնախարարը։
Միաժամանակ ան նշած է, որ դրացի երկիրներու տարածքը կը թիրախաւորուի միայն այն պարագային, երբ «այդ տարածքներուն մէջ գտնուող թշնամական պետութիւններու ռազմակայանները գործօն են եւ կ’օգտագործուին Իրանի անմեղ բնակիչներուն դէմ հարուածներ հասցնելու նպատակով»։
Թուրքիա դատապարտած է Նախիջեւանին հասցուած հարուածը
“Անգարան կը դատապարտէ Ազերպայճանի Նախիջեւանի տարածաշրջանին հասցուած հարուածը”,– իր կարգին յայտարարած է Թուրքիոյ Արտաքին գործոց նախարարութիւնը՝ կոչ ընելով «դադրեցնելու երրորդ երկիրներուն հասցուող հարուածները»։
«Մենք անգամ մը եւս կոչ կ’ընենք դադրեցնելու տարածաշրջանին մէջ գտնուող երրորդ երկիրները թիրախաւորող հարուածները, որոնք կրնան յանգիլ պատերազմի տարածման»,– յայտարարած է Թուրքիոյ Արտաքին քաղաքական գերատեսչութիւնը։
Այս յայտարարութիւնը հրապարակուած է Թուրքիոյ եւ Ազերպայճանի արտաքին գործոց նախարարներ Հաքան Ֆիտանի եւ Ճէյհուն Պայրամովի հեռաձայնային զրոյցէն քանի մը ժամ ետք։
