Նիս. քաղաքապետ Էրիք Սիոթի հանդիպում ունեցաւ Հայաստանի դեսպանին հետ

Կիրակի, Մարտ 29-ին, Նիսի նորընտիր քաղաքապետ Էրիք Սիոթի ընդունեց Ֆրանսայի մէջ Հայաստանի դեսպան Արման Խաչատրեանը։ Այս պաշտօնական հանդիպումը տեղի ունեցաւ քաղաքապետի տեղակալին, քաղաքապետական խորհուրդի քանի մը անդամներուն եւ տեղական հայկական կազմակերպութիւններու ներկայացուցիչներուն մասնակցութեամբ։

Դիւանագէտը շնորհաւորեց քաղաքապետը իր վերջին ընտրութեան առթիւ՝ անոր մաղթելով լիակատար յաջողութիւն իր նոր պարտականութիւններուն մէջ։ Ան յատկապէս ողջունեց Էրիք Սիոթիի մշտական յանձնառութիւնը՝ ի նպաստ Հայաստանին եւ ֆրանսահայ համայնքին, միաժամանակ շեշտելով երկու ազգերը միացնող պատմական բարեկամութեան կապերը շարունակաբար ամրապնդելու կարեւորութիւնը։

Զրոյցի ընթացքին քննարկուեցան Նիսի եւ Երեւանի միջեւ գործընկերութեան զարգացման հեռանկարները՝ յատկապէս ապակեդրոնացեալ համագործակցութեան ծիրէն ներս, ինչպէս նաեւ երկկողմանի հետաքրքրութիւն ներկայացնող զանազան հարցեր։ Այնուհետեւ, Էրիք Սիոթին եւ Արման Խաչատրեանը ներկայ գտնուեցան Նիսի Սուրբ Աստուածածին հայկական եկեղեցւոյ մէջ մատուցուած Սուրբ պատարագին, որմէ ետք այցելեցին Պարսամեան վարժարան։ Դեսպանը նաեւ առիթէն օգտուելով՝ անմիջական զրոյց ունեցաւ հայ համայնքի անդամներուն հետ։

Քաղաքի շքանշանի յանձնում եւ պաշտօնական ճամբորդութեան հեռանկար

Ի նշանաւորումն այս ջերմ հանդիպումին՝ Էրիք Սիոթի Արման Խաչատրեանին յանձնեց Նիս քաղաքի 160-ամեակի շքանշանը. խիստ խորհրդանշական քայլ մը, որուն մասին քաղաքապետը գրառում կատարեց «X» ընկերային ցանցին վրայ։

Օգտուելով հանդիպումին առիթէն՝ քաղաքապետը յայտնեց նաեւ իր մտադրութիւնը՝ մօտիկ ապագային պաշտօնական այցով մեկնելու Հայաստան։ Այս յառաջիկայ ուղեւորութեան գլխաւոր նպատակն է գործնական հիմքերու վրայ դնել արծարծուած խնդիրները եւ աւելի եւս ամրապնդել իր ղեկավարած քաղաքին եւ Հայաստանի միջեւ համագործակցութիւնը։