Հոկտեմբեր 24-30, Լատվիոյ մայրաքաղաք Ռիկայի Ազգային թատրոնին մէջ կայացած է օփերայի սպանացի ծանօթ երգիչ Փլասիտօ Տոմինկոյի հիմնադրած Operalia 2022 միջազգային մրցոյթը, որուն մասնակցած են բազմաթիւ երիտասարդ երգիչներ՝ աշխարհի տասնեակ երկիրներէն։
Հայաստանը ներկայացնող սոփրանօ Ջուլիանա Գրիգորեան շահած է առաջին մրցանակը, տիրանալով նաեւ «Ռոլեքս» ընկերութեան կողմէ տրուող Հանդիսատեսի մրցանակին՝ «Rolex Prize of the Audience։ Իսկ տղոց մրցանակը շահած է ամերիկացի թենոր Անթոնի Լէոն։
Մրցանակները յանձնած է Փլասիտօ Տոմինկօն։
Ջուլիանա Գրիգորեան Ա. Սպենդիարեան օփերայի եւ պալէի ազգային ակադեմական թատրոնի երիտասարդական ծրագրի մենակատար է: Ան ելոյթներ ունեցած է Հայաստանի պետական սիմֆոնիք, ազգային ֆիլհարմոնիք, սենեկային նուագախումբերուն հետ: Բազմաթիւ համերգներով հանդէս եկած է Հայաստանի տարբեր շրջաններու եւ Արցախի մէջ:
Երգչուհին համագործակցած է երաժիշտներ Տիգրան Մանսուրեանի, Ռոբերտ Ամիրխանեանի, Վաչէ Շարաֆեանի հետ:
