Ամսթերտամի եկեղեցին Եւրոպայի ամենահին պահպանուած հայկական եկեղեցիներէն է։ Ան կառուցուած է 17-րդ դարուն, վերանորոգուած, այնուհետեւ երկար ժամանակ փակուած է պաշտամունքի համար, մինչեւ վերաօծումը 1989 թուականին։ Այսպէս, Ամսթերտամի մէջ, Մարսիլիոյ անյաջող փորձէն յետոյ, Ոսկան Երեւանցի յաջողեցաւ հայերէնով տպել առաջին Աստուածաշունչը, 1668-ին։

Նոյեմբեր 19-ին եւ 20-ին Ամսթերտամի Ս. Հոգի հայկական եկեղեցին հիւրընկալեց Արեւմտեան Եւրոպայի կաթողիկոսական պատուիրակ Խաժակ արքեպիսկոպոս Պարսամեանը, որ եկած էր նախագահելու ծխական համայնքի վերահաստատման 33-րդ տարեդարձին նուիրուած արարողութիւններուն։

Իր ժամանումին՝ ան նախ հանդիպում ունեցաւ եկեղեցւոյ ծխական խորհուրդին հետ։ Յաջորդող ճաշի ընթացքին, Ծուխի հովիւ Հայր Տարօն ներկայացուց Խորհուրդի նոր անդամները։ Այս առիթով Խաժակ արք. ներկաներուն խօսեցաւ ծխական խորհուրդի կարեւորութեան ու առաքելութեան մասին։

Հովուական այս այցելութեան ընթացքին հանդիպում մը տեղի ունեցաւ նաեւ ծխական երիտասարդներուն հետ։ Սուրբ Հոգի եկեղեցւոյ Երիտասարդաց միութիւնը,– AYO ընկերակցութիւնը, – կազմակերպած էր դասախօսութիւն մը՝ «Ամուսնութիւնը եւ զոյգերու յարաբերութիւնները» բնաբանով։ Խաժակ արք. շատ աշխուժ եւ ազատ զրոյց ունեցաւ երիտասարդներուն հետ Եկեղեցւոյ առաջարկած ընտանիքի տիպարին, յարատեւ եւ երջանիկ միութիւն կառուցելու բանալիներուն մասին:

Ամսթերտամի հայ համայնքը շնորհակալութիւն կը յայտնէ Խաժակ արք. Պարսամեանին՝ այս այցելութեան եւ իր անդամներուն հանդէպ ունեցած հոգածու վերաբերումին համար։

Սահակ ՍՈՒՔԻԱՍԵԱՆ ■