Երեւանի մէջ սկիզբ կ՚առնեն ճանապարհաշինական երեք մեծ ծրագրեր

«Երեւանի կառուցապատման ներդրումային ծրագրերու իրականացման գրասենեակ»-ի տնօրէն Անեթա Բաբայեանի հաղորդած տեղեկութիւններուն համաձայն՝ այս օրերուն շինարարական աշխատանքներ պիտի սկսին մայրաքաղաքի երեք տարբեր վայրերու մէջ։

Նախատեսուած ծրագրերը կ՚ընդգրկեն Նորագաւիթի մէջ «Հիւսիս-Հարաւ» մայրուղիի մէկ հատուածին վրայ նոր վերնանցքի մը կառուցումը, Իսակովի եւ Արշակունեաց պողոտաները միացնող ճանապարհային նոր հանգոյցի մը շինարարութիւնը, ինչպէս նաեւ Բաբաջանեան-Աշտարակ ուղեգիծին վրայ նոր ճամբու մը աշխատանքներուն ամբողջացումը։

Կ՚ակնկալուի, որ ենթակառուցային այս նախագիծերը մեծցնեն գլխաւոր մայրուղիներու երթեւեկութեան տարողունակութիւնը եւ նուազեցնեն խճողումները Երեւանի ճանապարհային ցանցին մէջ։ Աշխատանքներուն մէկ մասը պիտի գանձատրուի Երեւանի պիւտճէէն։ Նշենք, որ այս ծրագրերուն մեկնարկը նախապէս յետաձգուած էր, մասամբ այն պատճառով, որ ապագայ ճանապարհներուն երկայնքին գտնուող հողաշերտերու կարգ մը սեփականատէրեր մերժած էին տարածքներու վաճառքին համար պետութեան առաջարկած պայմանները։