Սակայն, Արցախ կը շարունակէ մնալ շրջափակուած
Ազերպայճանցի կեղծ բնապահները, որոնք Դեկտեմբեր 12-էն փակած էին Բերձորի միջանցքը, Ապրիլ 28, ժամը 18-ին դադրեցուցին չորս ամիսէ աւելի տեւած իրենց ցուցարարական արարքները։ Անոնք բնապահական կեղծ պատրուակներով՝ արգիլած էին միջանցքով ազատ տեղաշարժը:
Լուրը կը հաղորդէր ազերպայճանական «Azertac» գործակալութիւնը, նշելով, թէ Շուշիի մէջ Ազերպայճանի նախագահի ներկայացուցիչ Այտին Քերիմով հանդիպում ունեցած է «բնապահներ»-ու 10 ներկայացուցիչներու հետ, անոնց հաղորդելով, թէ միջանցքին վրայ ազերպայճանական անցակէտի տեղադրումով՝ նոր իրավիճակ ստեղծուած է, հետեւաբար, առաջարկած է դադրեցնել ցոյցը:
Ազերպայճանի իշխանութիւններուն կողմէ հովանաւորուող կեղծ բնապահները այնուհետեւ խորհրդակցելէ ետք յայտարարած են, թէ կը դադրեցնեն իրենց այսպէս կոչուած «բնապահական» արարքները։
Ի դէպ, անոնց մեկնումէն ետք ալ Արցախ կը շարունակէ մնալ շրջափակման մէջ, քանի որ Ազերպայճան՝ Արցախ-Հայաստան սահմանագծին գտնուող Հակարիի կամուրջին մօտ անցակէտ տեղադրած է։
