Ալֆորվիլի Կապոյտ խաչի սպանական «ճամբորդութիւնը»՝ աւանդական «փայլա»-ի շուրջ
Կիրակի, Սեպտեմբեր 13-ին, Ֆրանսահայ Կապոյտ խաչի Ալֆորվիլի «Հելէն Բիւզանդ» մասնաճիւղը կազմակերպեց իւրայատուկ հացկերոյթ մը, որ բացառիկ յաջողութիւն արձանագրեց։ Ներկաները ճաշակեցին «Délice Paëlla»-ի պատրաստած համադամ սպանական «փայլա»-ն՝ ջերմ ու ամառնային մթնոլորտի մը մէջ։
Այս իպերեան ճամբորդութիւնը ամբողջացնելու համար, յետմիջօրէն յատկանշուեցաւ «Lunares Tacones» միութեան ֆլամենքօ պարողներու ելոյթով։ Անոնք խանդավառեցին հանդիսատեսը՝ հրաւիրելով զանոնք միանալու իրենց պարահարթակին վրայ։ Անտալուզեան կշռոյթներուն եւ վարակիչ բարձր տրամադրութեան ընդմէջէն, տօնական ոգին արագօրէն համակեց բոլոր հիւրերը։
Խոհարարական վայելքէն եւ երաժշտութենէն անդին, այս հանդիպումը մանաւանդ հիանալի առիթ մըն էր մէկտեղելու Ալֆորվիլի եւ այլ շրջաններու հայ համայնքի անդամները՝ ուրախ եւ տօնական պահեր բաժնելու համար։ Անիկա նաեւ ուժերը համախմբելու գերազանց միջոց մըն էր, որպէսզի նոր տարեշրջանը դիմաւորուի խանդավառութեամբ եւ նոր աւիւնով։ ■
