Նիակարայի ջրվէժը պիտի ողողուի հայոց եռագոյնով՝ Հայաստանի անկախութեան 35-ամեակին առիթով
Սեպտեմբեր 21-ի երեկոյեան, Նիակարայի հռչակաւոր ջրվէժը պիտի լուսաւորուի հայոց ազգային դրօշի՝ կարմիր, կապոյտ եւ նարնջագոյն լոյսերով՝ նշելու համար Հայաստանի Հանրապետութեան անկախութեան 35-րդ տարեդարձը։
Գանատայի մէջ Հայաստանի դեսպանութեան հրապարակած յայտարարութեան համաձայն՝ լուսաւորման այս արարողութիւնը, որ կազմակերպուած է «Niagara Parks»-ի գործակցութեամբ, տեղի պիտի ունենայ տեղական ժամով 22-ին։ Դիւանագիտական առաքելութիւնը բաց հրաւէր կ՚ուղղէ համայնքի անդամներուն եւ շրջանի բոլոր այցելուներուն՝ համախմբուելու եւ անձամբ վկան դառնալու այս խորհրդանշական յարգանքի տուրքին։
Տօնակատարութիւնները իրենց արձագանգը պիտի գտնեն նաեւ Գանատայի մայրաքաղաքին մէջ ամբողջ օրուան ընթացքին, ուր Օթթաուայի քաղաքապետարանի շէնքին առջեւ պաշտօնապէս պիտի բարձրացուի Հայաստանի ազգային դրօշը։ Զուգահեռաբար, մայրաքաղաքի կեդրոնը գտնուող Օթթաուայի հանրածանօթ ցուցանակը նոյնպէս պիտի փայլի հայկական եռագոյնով՝ ի փառաւորումն այս պատմական հանգրուանին։
