Վերիշէն. մեղուաբուծութեամբ կերտուող նոր սկիզբ մը
2023-ին Արցախէն տեղահանուելէ ետք Սիւնիք հաստատուած Արմէն Աղայեան, Ֆրանսայի Հայկական Հիմնադրամին աջակցութեամբ, կը զարգացնէ մեղուաբուծական իր գործունէութիւնը։ Անոր անցած ուղին կը վկայէ այնպիսի զօրակցութեան մը կարեւորութեան մասին, որ շահառուներուն առիթ կու տայ վերագտնելու իրենց արհեստավարժութիւնն ու հմտութիւնները։
Արմէն Աղայեան մեղուաբուծութեան ծանօթ էր նոյնիսկ Արցախէն հեռանալէ առաջ։ Ստեփանակերտցի այս արհեստաւորը այժմ իր ընտանիքին հետ կ՚ապրի Վերիշէնի մէջ, ուր կը մշակէ բանջարանոց մը եւ կը խնամէ չորս փեթակներ, զորս ստացած է 2026 Յունիսին՝ Ֆրանսայի Հայկական Հիմնադրամի մէկ ծրագրի ծիրէն ներս, որ կը վայելէ Հայաստանի Կարմիր խաչի աջակցութիւնը։
Ըստ Հիմնադրամին՝ այս առաջին եղանակը անոր հնարաւորութիւն տուած է հաւաքելու շուրջ տասներեք քկ. մեղր։ «ApiflorDev» ընկերակցութեան փորձագէտ Միշէլ Թարտիէօ, որ վերահսկողական այցելութիւններու պատասխանատուն է, ընդգծած է մեղուաընտանիքներուն հանդէպ ցուցաբերուած խնամքը։ Արմէն Աղայեան իր փեթակները նախապատրաստած է նաեւ ձմեռուան, ինչ որ էական փուլ մըն է իր գործունէութեան շարունակականութեան համար։
Ֆրանսայի Հայկական Հիմնադրամի նախագահ Պետրոս Թերզեան Սիւնիք կատարած իր ուղեւորութեան ընթացքին այցելած է զինք, որուն ժամանակ ան եղած է նաեւ Սպանդարեանի ջրանցքի նորոգութեան աշխատավայրը։ Մեղուաբուծական ծրագրին ուղեկցող խումբերու ներկայութեամբ կայացած հանդիպումը թոյլ տուած է արծարծել այս գործի զարգացման համար անհրաժեշտ միջոցները։
Փեթակներու յատկացումէն անդին՝ այժմ կը դրուի սարքաւորումներու հարցը։ Քննարկուած տարբերակներու շարքին է հաւաքական գործածութեան համար նախատեսուած մեղրաքամ սարքերու համագանձատրումը։ Այս սարքաւորումները մեղուաբոյծներուն պիտի արտօնեն ունենալ հասարակաց միջոցներ՝ իրենց բերքը մշակելու համար։
Թէեւ Վերիշէնի այս փորձառութիւնը համեստ քայլ մըն է, բայց եւ այնպէս անիկա կը ցոլացնէ Արցախէն տեղահանուածներու զօրակցութեան գործնական մէկ երեսը. անոնց նոր բնակավայրին մէջ միջոցներ տրամադրել՝ շարունակելու համար աքսորէն առաջ ձեռք բերուած հմտութիւնները։
