Դեսպան Վասիլիս Մարակոս կ՚ողջունէ Արթուր Օսիպեանի ազատ արձակումը
«Կ՚ողջունեմ Արթուր Օսիպեանը ազատ արձակելու որոշումը։ Ասիկա դրական զարգացում է։ Ժողովրդավարութեան, հիմնական իրաւունքներու, պատշաճ գործընթացի եւ արտայայտուելու ազատութեան նկատմամբ յարգանքը Եւրոպական Միութեան եւ Հայաստանի հասարակաց արժէքներուն առանցքային մասը կը կազմեն»,– X-ի իր էջին գրած է Հայաստանի մէջ Եւրոպական Միութեան դեսպան Վասիլիս Մարակոս։
«Մենք պիտի շարունակենք հետեւիլ այս գործին»,– նշուած է դեսպանի գրառումին մէջ։
Յիշեցնենք, որ վարչապետին հետ վիճելէն ետք ձերբակալուած Օսիպեան 23 օր Նուպարաշէնի բանտին մէջ մնալէ ետք, Յունիս 10-ի երեկոյեան ազատ արձակուած է։ Բռնութիւն գործադրելու հրապարակային կոչերու, խուլիկանութեան եւ քարոզչութիւնը խոչընդոտելու յօդուածներով մեղադրուող երիտասարդը ի նշան բողոքի հացադուլ յայտարարած էր՝ Նիկոլ Փաշինեանէն պահանջելով ներողութիւն խնդրել զինք «[Արցախէն] փախած» անուանելուն եւ վիրաւորելուն համար։
Յունիս 7-ի խորհրդարանական ընտրութիւններէն երկու օր առաջ, Մարակոս Օսիպեանի հարցը քննարկած էր Մարդկային իրաւանց պաշտպան Անահիտ Մանասեանին հետ։ ■
