Մինչեւ օրս Ազերպայճանէն Հայաստան առաքուած է մօտ 17 հազար թոն նաւթամթերք

Յունիս 20-ին Ազերպայճանի տարածքով Հայաստան առաքուած է 7 վակոն ռուսական հացահատիկ՝ 490 թոն ընդհանուր ծանրութեամբ։

Այս մասին հաղորդելով՝ ազերպայճանական «APA» լրատուական գործակալութիւնը կը նշէ, որ մինչեւ օրս Ռուսաստանէն Ազերպայճանի տարածքով Հայաստան արդէն իսկ առաքուած է աւելի քան 29 հազար թոն հացահատիկ, 7 հազար թոնէն աւելի պարարտանիւթ, 414 թոն անթրասիթ (քարածուխի տեսակ), 133 թոն ալիւմինում եւ 68 թոն հնդկացորեն։

Տարանցիկ փոխադրումներէն բացի, Ազերպայճանէն Հայաստան կ՚արտածուի նաեւ նաւթամթերք։ Ըստ գործակալութեան տուեալներուն՝ մինչեւ օրս Ազերպայճան Հայաստանին մատակարարած է աւելի քան 13 հազար թոն տիզելային վառելանիւթ, 979 թոն «ԱԻ-92» եւ 2955 թոն «ԱԻ-95» տեսակի պենզին։