Ֆրանսան եւ Սպանիան կը դիմագրաւեն անտառային հսկայական հրդեհներ, մինչ կը սպառնայ տօթի նոր ալիք մը

Երկուշաբթի օրէն ի վեր հրշէջները կը պայքարին Ֆրանսայի եւ Սպանիոյ անտառներուն մէջ մոլեգնող լայնածաւալ հրդեհներուն դէմ։ Կացութիւնը յատկապէս ծանր է Սպանիոյ մէջ, ուր իշխանութիւնները ազգային արտակարգ դրութիւն յայտարարած են։ Վալենսիայի մերձակայքը ծագած հրդեհը տարեց անձի մը մահուան պատճառ դարձած է։

Ֆրանսայի մէջ կրակը կը սպառնայ իր խաղողի այգիներով ծանօթ եւ Ատլանտեան ովկէանոսի ափերը այցելող զբօսաշրջիկներու հիմնական հանգոյց հանդիսացող Պորտօ քաղաքին ու յարակից Ժիրոնտ նահանգին։ Պորտոյի քաղաքապետ Թոմա Քազնաւ յայտնեց, որ հրդեհը գլխաւոր քաղաքի մուտքերէն հազիւ 15 քիլոմեթր հեռաւորութեան վրայ կը գտնուի, իսկ Ֆրանսայի Ներքին գործոց նախարար Լօռան Նունիէս «X» հարթակին վրայ կացութիւնը որակեց «բարդ»։ Կրակը արդէն հասած է Աքիթէնի շրջանի ամառնային յայտնի հանգստավայր Քափ Ֆերէ։

Աննախադէպ տաքի ալիքին պատճառով երկու երկիրներուն մէջ աւելի քան 325 հազար հոգի հարկադրաբար տարհանուած է իրենց բնակավայրերէն. անոնցմէ շուրջ 220 հազարը՝ Ֆրանսայի հարաւ-արեւմուտքէն։ Ըստ «Reuters Climate Monitor»-ի տուեալներուն՝ այս ամսուան ընթացքին Պորտօն ընդգրկող Աքիթէնի շրջանին մէջ առաւելագոյն ջերմաստիճանի միջինը կազմած է 32,2 աստիճան, ինչ որ 7,3 աստիճանով կը գերազանցէ 1961-1990 թուականներու ամսական բնականոն չափը։

Ստեղծուած տագնապալի իրավիճակին լոյսին տակ, նախագահ Էմանիւէլ Մաքրոն կառավարութեան արտակարգ նիստ հրաւիրեց։ Միւս կողմէ, Սպանիոյ վարչապետ Փետրօ Սանչէս կ՚այցելէ հրդեհներէն տուժած Վալենսիայի շրջանները, ուր հրշէջները կը շարունակեն պայքարիլ նոր բռնկումներու դէմ, եւ ուրկէ արդէն 15 հազար քաղաքացի տարհանուած է։