Գրող Սիլվէն Թեսոնի եւ լրագրող Ժան-Քրիսթոֆ Պիւիսոնի հովանաւորութիւնը վայելող՝ Ֆրանսայի հայկական հիմնադրամի 2022-ի Ֆոնեթոնին,– որ տեղի ունեցաւ Նոյեմբեր 17-էն 20,– հանգանակուեցաւ 1,64 միլիոն եւրօ։ Սա 5,1%-ով կը գերազանցէ անցեալ տարուան հասոյթը։

Հանգանակուած գումարներուն շնորհիւ Հայկական հիմնադրամը պիտի կարենայ ծաւալել գերակշռութեամբ գիւղատնտեսութեան բնագաւառին մէջ աջակցութեան իր ծրագիրը Սիւնիքի եւ Տաւուշի սահմանամերձ գիւղերուն եւ Արցախի մէջ, ինչպէս նաեւ զայն ընդլայնել մինչեւ Գեղարքունիքի գիւղերը։ 

Տաւուշի մէջ բացուեցաւ Փաթրիք Տեվեճեանի անունը կրող ֆրանքեւհայկական գիւղատնտեսութեան երկրորդական դպրոցը: Անոր մօտակայքը՝ Լուսաձորի մէջ, Հիմնադրամին հաստատած մեծ ագարակը գործնական վարժանքներու դաշտ պիտի ծառայէ դպրոցի աշակերտութեան։

Պիտի պահպանուի նաեւ ճգնաժամէն ծանրօրէն տուժած Լիբանանի հայկական դպրոցներուն ցուցաբերուող օգնութիւնը։

Ֆոնեթոնի դրամահաւաքը կը շարունակուի *։ Դուք կրնաք ձեր նուիրատւութիւնները ղրկել մինչեւ 2023 Յունուար 15՝ օգտուելով 2022-ի հարկային զեղչերէն: 

Հիմնադրամը կոչ կ՚ընէ նաեւ միանալու դրամատնային ուղղակի գանձումով (prélèvement) արշաւին՝ «Հայաստան՝ ամէն ամիս»-ին։ Այս արշաւով նախատեսուած ծրագրերէն առաջինը արդէն սկիզբ առած է. ան կը վերաբերի սահմանամերձ գիւղերու մէջ քաղաքացիական ինքնապաշտպանական խումբերու համար պաշտպանողական սարքերու գնումին։ Անոնք, որոնք կը փափաքին աջակցիլ այս ծրագրին, կրնան այցելել՝ https://www.fondsarmenien.org/l-armenie-tous-les-mois/

* Ֆրանսայի Հայկական հիմնադրամին նուիրատւութիւն կատարելու համար այցելել՝ www.fondsarmenien.org կայքը

կամ՝ հեռաձայնել 0809 54 26 26 (անվճար) թիւին։ ■