Եւրոպական Միութիւնը Ազերպայճանին կոչ ըրած է ապահովելու Լաչինի միջանցքով անվտանգ ու ազատ տեղաշարժը
Եւրոպական Միութեան Արտաքին քաղաքական հարցերու մամլոյ բանբեր Փեթեր Սթանօ Ազերպայճանի իշխանութիւններուն կոչ ըրած է ապահովելու Լաչինի միջանցքով ազատ ու անվտանգ տեղաշարժը՝ համաձայն 2020 Նոյեմբեր 9-ի եռակողմ յայտարարութեան։
Ան թուիթըրեան իր էջին գրած է. «Նման սահմանափակումները մարդասիրական զգալի խնդիրներ կը ստեղծեն տեղւոյն բնակչութեան համար։ Եւրոպական Միութիւնը մտահոգ է նաեւ Ազերպայճանի կողմէ Ղարաբաղի կազի մատակարարման դադրեցման շուրջ հրապարակուած հաղորդագրութիւններով։ Խնդիրները պէտք է լուծուին երկխօսութեան եւ շահագրգիռ կողմերու հետ խորհրդակցութիւններու միջոցով»:
