Ապրիլ 10-ին, Լիոնի քաղաքապետ Կրեկորի Տուսէի գլխաւորած պատուիրակութիւնը այցելած է Հայոց ցեղասպանութեան յուշահամալիր՝ Երեւանի փոխքաղաքապետ Սուրէն Գրիգորեանի ուղեկցութեամբ։ Հիւրերը դիմաւորած եւ յուշահամալիրի ստեղծման պատմութիւնը ներկայացուցած է Ցեղասպանութեան թանգարան-հիմնարկի տնօրէն Յարութիւն Մարութեան։
Ան անդրադարձած է նաեւ Ծիծեռնակաբերդի տարածքին անցեալ դարավերջին Ազերպայճանի Սումկայիթ, Կիրովապատ (Գանձակ), Պաքու քաղաքներուն մէջ ազերական կառավարութեան կազմակերպած կոտորածներուն զոհ դարձած Հայերու յիշատակին տեղադրուած երեք խաչքարերու եւ Արցախեան գոյամարտի տարիներուն Յուշապատին դիմացը յուղարկաւորուած հինգ ազատամարտիկներու պատմութիւններուն՝ շեշտելով կապը տեղի ունեցածին եւ Հայոց ցեղասպանութեան միջեւ:
Կրեկորի Տուսէ ծաղկեպսակ զետեղած է Հայոց ցեղասպանութեան զոհերուն յիշատակը յաւերժացնող յուշակոթողին ու անմար կրակին առջեւ, մէկ վայրկեան լռութեամբ յարգելով Հայոց ցեղասպանութեան սրբադասուած նահատակներուն յիշատակը։
Այնուհետեւ Լիոնի քաղաքապետարանի ներկայացուցիչները շրջած են ցեղասպանութեան թանգարանին մէջ, տեղւոյն վրայ ծանօթանալով մնայուն եւ առժամեայ ցուցադրութիւններուն:
Այցի աւարտին հիւրերը ծառ տնկած են Յիշողութեան պուրակին մէջ։
Նոյն օրը Լիոնի քաղաքապետը «Եռաբլուր» զինուորական պանթէոնի մէջ յարգանքի տուրք մատուցած է Արցախեան պատերազմներու նահատակներուն յիշատակին։
Նշենք, թէ Լիոնի քաղաքապետը 8-14 Ապրիլ պաշտօնական այցելութեամբ Երեւան կը գտնուի։
