Մեծի Տանն Կիլիկիոյ Արամ Ա․ կաթողիկոսը՝ զրուցելով Ուրուկուայի «Արաքս» ձայնասփիւռի տնօրէն լրագրող Տիեկօ Գարամանուկեանի հետ յայտարարած է, թէ Հակառակ քաղաքական տարակարծութեանց՝ հայ ազգը կոչուած է իր ինքնութիւնը պահելու կենսունակ եւ իր միասնականութիւնը՝ ամուր:
“Մենք փոքր ազգ ենք, պատմութեան ընթացքին շատ բան կորսնցուցած ենք՝ նոյնիսկ հայրենիք, պետականութիւն, սակայն մենք չենք կորսնցուցած մեր ինքնութիւնը, մեր պատկանելիութիւնը: Թէ՛ մեր ինքնութեան, թէ՛ մեր պատկանելիութեան տարրերը մեր հոգեւոր, բարոյական, ազգային, մշակութային արժէքներն են ու աւանդութիւնները: Մենք կոչուած ենք մեր հայրերու աւանդութիւններուն ամուր կառչած մնալու”,– ընդգծած է Վեհափառ հայրապետը:
Ան նշած է, թէ հայ ազգը այսօր կը գտնուի իր ժամանակակից պատմութեան ամէնէն վտանգաւոր եւ ճակատագրական փուլին:
“Այս տագնապներուն դէմ հիմնականը եւ առաջնահերթը մեր ժողովուրդին միասնականութիւնն է: Եթէ նայինք մեր պատմութեան, մեր ժողովուրդի ամենաճակատագրական պահերուն՝ իրարու թշնամի նախարարները կանգնած են կողք-կողքի եւ պաշտպանած հայրենիքն ու ազգը, օրինակ՝ Վարդանանց պատերազմի ժամանակ”,– յայտնած է Արամ Ա․ կաթողիկոս:
Ան շեշտած է, որ ինք պատրաստ է իր ներկայութեամբ երաշխաւորելու հայ ժողովուրդին միասնականութիւնը:
“Այս ուղղութեամբ ես միշտ իմ պատրաստակամութիւնը յայտնած եմ՝ թէ՛ անձնական խօսակցութեանց ընթացքին, թէ՛ հրապարակաւ: Այս վերջին շրջանին խորհրդակցութիւններ եղած են, երկու վեհափառ հայրապետներուն միջեւ մնայուն խորհրդակցութիւն կայ այս գծով եւ այդ խորհրդակցութիւնները պէտք է շարունակուին. պէտք է մեր քաղաքական պատասխանատուներուն հետ խօսինք, մեր տեսակէտները դառնան աւելի յստակ: Մա՛նաւանդ հասարակական մօտեցումը ձեւաւորելու իմաստով կարեւոր են այս խորհրդակցութիւնները՝ քաղաքական պատասխատուներու հետ, նաեւ ընդդիմադիրներու հետ: Կը կարծեմ, որ այս հարցով կարեւոր դեր ունին Արցախի եւ Սփիւռքի ղեկավարները”,– շեշտած է Արամ Ա․ կաթողիկոս:
