15-ամեակին առթիւ՝ «Թումօ»-ն կը ցուցադրուի Նիւ Եորքի Թայմզ Սքուերի հսկայական պաստառին վրայ
Իր հիմնադրութեան 15-ամեակին առթիւ, հայկական նորարարական կրթական օճախը՝ «Թումօ» ստեղծարար արհեստագիտութիւններու կեդրոնը, ցուցադրուեցաւ Նիւ Եորքի Թայմզ Սքուերի մէջ գտնուող «Nasdaq» աշտարակի հսկայական թուային պաստառին վրայ։
Այս յատկանշական ցուցադրութիւնը կազմակերպուած էր որպէս յոբելեինական յատուկ տուրք՝ Nasdaq-ի ներկայացուցիչ Քրիսթինա Այանեանի կողմէ, որ նաեւ պիտի վարէ այս Սեպտեմբերին Լոս Անճըլըսի մէջ կայանալիք Թումոյի 15-ամեակի հանդիսաւոր երեկոյթը։ Այս ցուցադրութիւնը զուտ տօնական բնոյթ կը կրէր եւ որեւէ կապ չունէր բաժնետոմսերու հրապարակային առաջարկի (IPO) կամ արժեթուղթերու պաշտօնական ցուցակագրման հետ։
Հսկայական պաստառին վրայ լուսարձակի տակ առնուած էր հետեւեալ մտածել տուող հարցադրումը. «Ի՞նչ կ՚ըլլար, եթէ աշակերտները ազատ ըլլային հեռանալու»։ Այս նախադասութիւնը կ՚ընդգծէ Թումոյի իւրայատուկ՝ ինքնակրթութեան փիլիսոփայութիւնը, որ պատանիներուն առիթ կու տայ առանց կոշտ սահմանափակումներու ազատօրէն կառուցելու եւ ընտրելու իրենց կրթական ուղին այնպիսի մարզերու մէջ, ինչպէս՝ ծրագրաւորումը, կենդանապատկերը (animation), շարժանկարչութիւնը եւ գծագրական ձեւաւորումը (graphic design):
