Յուլիսին սպասարկուած է 735 հազար ճամբորդ

Հայաստան կը շարունակէ ամրապնդել իր դիրքը որպէս տարածաշրջանի գլխաւոր փոխադրական հանգոյց՝ թէ՛ մայրուղիներով, թէ՛ երկաթուղիով, թէ՛ ալ օդային ճանապարհներով։ Մինչ կը վերջնականանան «Զուարթնոց» միջազգային օդակայանի ընդլայնման եւ վերանորոգման ծրագրերը, միայն 2026 Յուլիսին հայաստանեան օդակայանները սպասարկած են 735.000 ճամբորդ։ Ասիկա բացարձակ մրցանիշ մըն է նախորդ ամիսներուն համեմատ՝ 17,2 տոկոսով գերազանցելով 2025-ի Յուլիսի ցուցանիշը։

Նախորդ մրցանիշը հաստատուած էր 2025 Օգոստոսին, երբ մէկ ամսուան մէջ արձանագրուած էր 667.800 ճամբորդ։ Ընդհանուր առմամբ, 2026-ի սկիզբէն ի վեր, հայաստանեան օդակայանները արդէն իսկ սպասարկած են աւելի քան 3 միլիոն 400 հազար ճամբորդ։