Զախարովայի խիստ արտայայտութիւնները Փաշինեանին
«Կրնաք դադրիլ Ձեր ժողովուրդը խաբելէ. հաւաքեցէք Ձեր քաջութիւնը եւ գոնէ մէկ անգամ ճշմարտութիւնը ըսէք»
Ռուսաստանի Արտաքին գործոց նախարարութեան բանբեր Մարիա Զախարովա ընկերային ցանցերու իր էջին վրայ կոպիտ կերպով արձագանգած է վարչապետ Փաշինեանի այն յայտարարութեան, ուր վերջինս արդարացուցած էր նոր կառավարութեան ծրագրէն Ռուսաստանի հետ «ռազմավարական դաշինք» եզրոյթի հեռացումը՝ պատճառաբանելով 2022-ի Սեպտեմբերին ՀԱՊԿ-ի անգործութիւնը:
Զախարովա, խիստ ոճով դիմելով Փաշինեանին, գրած է. «Նիկոլ Վովայի, Ձեր երկրին մէջ ընտրութիւնները աւարտած են։ Կրնաք դադրիլ խաբելէ: Հաւաքեցէք Ձեր քաջութիւնը եւ գոնէ մէկ անգամ ճշմարտութիւնը ըսէք այնպէս, ինչպէս իրականութեան մէջ էր»:
Ռուս պաշտօնատարը յիշեցուցած է, որ 2022 Սեպտեմբերին ՀԱՊԿ-ն անմիջապէս արձագանգած է եւ գնահատման առաքելութիւն ուղարկած Հայաստան: Զախարովա աւելցուցած է, որ 2022 Նոյեմբերին Երեւանի մէջ կայացած ՀԱՊԿ-ի վեհաժողովին որոշումի նախագիծը, որ կը նախատեսէր ռազմական, քաղաքական եւ սահմանապահական աջակցութիւն Հայաստանին, արդէն պատրաստ էր, սակայն Փաշինեան անձա՛մբ հրաժարած էր զայն ստորագրելէ:
Զախարովա յիշեցուցած է նաեւ 2022 Հոկտեմբեր 6-ի Փրակայի հռչակագիրը, ուր Փաշինեան անձամբ, Եւրոպական Միութեան հովանիին տակ, ճանչցած էր Ազերպայճանի հողային ամբողջականութիւնը՝ 86.600 քառակուսի քիլոմեթրով, ներառեալ Լեռնային Ղարաբաղը:
«Երբ Ձեզի անյարմար հարցումներ կը յղեն, դադրեցէ՛ք պատասխանատւութիւնը բարդելէ բոլոր անոնց՝ Մոսկուայի, ՀԱՊԿ-ի, Ազերպայճանի, Հայաստանի նախկին ղեկավարութեան, Հայ առաքելական եկեղեցւոյ, ղարաբաղցիներուն ու անոնց երեխաներուն վրայ, զորս անձնապէս չէք սիրեր։ Ասիկա անբարոյականութիւն է: Բոլորը մեղաւոր են Ձեզի համար, բացի Ձեզմէ»,– եզրափակած է Զախարովան՝ զգուշացնելով, որ եթէ Երեւան փորձէ նոր բողոքագիր յղել, ստիպուած պիտի ըլլայ ապացուցելու այս պատմական փաստերուն «սխալ» ըլլալը։
