Շոյկուի տեղակալը Հայաստանի ԱԲ-ի գործատան մէջ կը տեսնէ արեւմտեան հետախուզութեան վտանգ
Ռուսաստանի Անվտանգութեան խորհուրդի քարտուղարի տեղակալ Ալեքսէյ Շեւցով մեկնաբանելով Օգոստոսի սկիզբը Հրազդանի մէջ «Firebird» ընկերութեան Արհեստական բանականութեան գործատան բացումը՝ զգուշացուցած է, որ ան կրնայ օգտագործուիլ «Ռուսաստանի, Իրանի եւ այլ պետութիւններու դէմ՝ յօգուտ արեւմտեան գաղտնի սպասարկութիւններու»։
Ռուսական «ԹԱՍՍ» լրատու գործակալութեան համաձայն՝ ան լրագրողներուն ըսած է, որ “այսպիսի կեդրոններ կրնան ի սպաս դրուիլ արեւմտեան գաղտնի սպասարկութիւններու վերլուծական եւ հետախուզական աշխատանքներուն՝ յատկապէս Իրանի, Ռուսաստանի, ինչպէս նաեւ Անդրկովկասի եւ Կեդրոնական Ասիոյ պետութիւններուն դէմ”։
Ռուսաստանի Անվտանգութեան խորհուրդի քարտուղար Սերկէյ Շոյկուի տեղակալը պնդած է. “Նկատի ունենալով, որ «Firebird» ընկերութիւնը կ՚ենթարկուի ամերիկեան օրէնսդրութեան, Միացեալ Նահանգներու գաղտնի սպասարկութիւններուն համար հասանելի կրնան դառնալ անոր սպասարկուներուն (servers) վրայ մշակուող բոլոր տուեալները”։ Ան եզրակացուցած է. “Ասիկա կը նշանակէ, որ հայաստանեան պետական հաստատութիւններու, ընկերութիւններու եւ քաղաքացիներու տուեալները հասանելի կ՚ըլլան Միացեալ Նահանգներուն՝ առանց հայկական իշխանութիւններու համաձայնութեան”։
Ռուս պաշտօնատարը նաեւ յայտարարած է, թէ այս կեդրոնի հզօրութեան մեծացումը ելեկտրականութեան տագնապի սպառնալիք կը ստեղծէ։ Երեւանէն տակաւին ոչ մէկ մեկնաբանութիւն հնչած է այս պնդումներուն վերաբերեալ։
Նշենք, որ ինչ կը վերաբերի ելեկտրականութեան պակասի վերաբերեալ մտավախութիւններուն, Բարձր արհեստագիտութիւններու արդիւնաբերութեան նախկին նախարար Մխիթար Հայրապետեան վստահեցուցած էր, որ Հայաստանի մէջ արտադրուող ելեկտրականութիւնը լիովին բաւարար պիտի ըլլայ գործատան կարիքները ապահովելու համար։
* * *
«ՆՅ» – Շեւցովի խօսքերը կրնան, բնականաբար, անկեղծ մտահոգութեան մը արտայայտութիւնը ըլլալ։ Բայց նկատի ունենալով նման հարցերու մէջ ռուսական կողմին սովորաբար անթափանցիկ կեցուածքը՝ պարզ կը դառնայ, որ այս յայտարարութիւնը կատարուած է Հայաստանի դէմ վերջերս Ռուսաստանի սանձազերծած արշաւին մէջ նոր ճակատ մը բանալու միտումով։ Ելեկտրականութեան պակասի շուրջ անոր հնչեցուցած «մտահոգութիւններն» ալ կու գան ջուր կրելու այս կասկածներու ջաղացքին. քանի որ այդ հարցը որեւէ աղերս չունի Ռուսաստանի անվտանգութեան հետ, այլ պարզապէս նման անդրադարձ կը հետապնդէ այս նորաբաց կեդրոնով սկսած ծրագիրը նսեմացնելու, ստուերելու նպատակը։
