Փաշինեան եւ Քոս քննարկած են ԵՄ մուտքի արտօնագրի ջնջման հարցերը
Վարչապետ Նիկոլ Փաշինեան եւ Եւրոպական Միութեան ընդլայնման հարցերու յանձնակատար Մարթա Քոս Մարտ 19-ին Երեւանի մէջ քննարկած են ԵՄ մուտքի արտօնագրի (վիզա) ջնջման գործընթացն ու տնտեսական եւ ներդրումային գործակցութեան ընդլայնման հեռանկարները։ Ըստ կառավարութեան հաղորդագրութեան, Քոս բարձր գնահատած է Հայաստանի բարեփոխումներն ու զանոնք իրագործելու քաղաքական կամքը՝ վերահաստատելով Եւրոպայի աջակցութիւնը հայկական քաղաքացիական հասարակութեան, լրասփիւռներուն եւ տարածաշրջանային խաղաղութեան ուղղուած Երեւանի ջանքերուն։
Այս այցելութեան ծիրէն ներս, որուն գլխաւոր նպատակն է ամրապնդել Հայաստան-ԵՄ գործընկերութիւնը, յանձնակատարը նախապէս հանդիպում ունեցած է նաեւ փոխվարչապետ Մհեր Գրիգորեանին հետ եւ յայտարարած՝ Հայաստանին լրացուցիչ 140 միլիոն եւրօ աջակցութիւն տրամադրելու որոշումին մասին։
Ընտրութիւններուն ընդառաջ՝ Եւրոպական Միութիւնը Ապրիլի սկիզբը յատուկ առաքելութիւն պիտի ղրկէ Հայաստան
Զուգահեռաբար, յայտնի դարձած է, որ Ապրիլի սկիզբը Եւրոպական Միութիւնը 9-էն 14 փորձագէտներէ բաղկացած յատուկ առաքելութիւն մը պիտի ղրկէ Հայաստան։ Շուրջ երկու շաբթուան ընթացքին առաքելութիւնը պիտի աջակցի Հայաստանի պետական կառոյցներուն՝ յատկապէս Վարչապետի աշխատակազմին, Անվտանգութեան խորհուրդին, Կեդրոնական ընտրական յանձնաժողովին եւ Ներքին գործոց նախարարութեան։ Նպատակն է օգնել այս մարմիններուն, որպէսզի դիմադրեն առցանց յարձակումներուն, խառնաձեւ սպառնալիքներուն եւ օտարերկրեայ տեղեկատուական շահարկումներուն՝ մշակելով ճգնաժամերու կառավարման յատուկ ծրագրեր։ ■
