Նախարար Ժաննա Անդրէասեանի պաշտօնական հանդիպումները Փարիզի մէջ
Ժաննա Անդրէասեան եւ Էտուար Ժեֆրէ
Փարիզ կատարած աշխատանքային այցելութեան ծիրէն ներս, Հայաստանի Կրթութեան, գիտութեան, մշակոյթի եւ մարզանքի նախարար Ժաննա Անդրէասեան Յուլիս 9-ին հանդիպումներ ունեցած է ֆրանսացի բարձրաստիճան պաշտօնատարներու հետ՝ ամրապնդելով երկկողմանի գործակցութիւնը կրթական, մշակութային եւ ֆրանսախօսութեան մարզերէն ներս։
Ֆրանսայի Ազգային կրթութեան նախարար Էտուար Ժեֆրէի հետ քննարկումներուն առանցքը կազմած է Հայաստանի դպրոցներուն մէջ արհեստական բանականութեան ներդրումը։ Անդրէասեան յատկապէս ընդգծած է «ԱԲ սերունդ», «STEP.AI» ծրագրերն ու «OpenAI»-ի հետ գործակցութիւնը, որուն շնորհիւ «ChatGPT Edu» գործիքը հասանելի պիտի դառնայ շուրջ 50 հազար հայաստանցի օգտատէրերու։ Զրոյցի ընթացքին արծարծուած են նաեւ դպրոցականներու կողմէ ընկերային ցանցերու գործածութիւնը սահմանափակելու նախաձեռնութիւնները, ինչպէս նաեւ նախադպրոցական կրթութեան ոլորտէն ներս փորձի փոխանակումն ու Փարիզի մէջ գործող «Թումօ» կեդրոնի յաջողութիւնները։
Այցելութեան մէկ այլ հանգրուանին, Ֆրանսախօսութեան, միջազգային գործընկերութեան եւ արտասահմանի ֆրանսացիներու հարցերու լիազօր նախարար Էլէոնոր Քարուայի հետ հանդիպման ընթացքին, գլխաւորաբար շեշտուած է 2027-ին Երեւանի մէջ կայանալիք Ֆրանսախօսութեան 10-րդ մարզամշակութային խաղերուն ֆրանսական կողմի աջակցութիւնը։ Անդրէասեան նշած է, որ Հայաստանի 250 դպրոցներուն մէջ շուրջ 60 հազար աշակերտներ ֆրանսերէն կ՚ուսանին, ապա գործընկերոջ հետ քննարկած է ֆրանսական բարձրագոյն հաստատութիւններու հնարաւոր մասնակցութիւնը Հայաստանի «Ակադեմական քաղաք» ծրագրին։
Բացի կրթական ուղղութիւններէն, հայկական պատուիրակութիւնը անդրադարձած է նաեւ մշակութային ժառանգութեան եւ արուեստի շուկային՝ այցելելով Փարիզի «Hôtel Drouot» ծանօթ աճուրդային կեդրոն։ Կառոյցի նախագահ Ալեքսանտր Ժիքելոյի հետ կայացած հանդիպումին համաձայնութիւն գոյացած է գործակցելու աճուրդային համակարգի կառավարման, մշակութային արժէքներու ապօրինի շրջանառութեան կանխարգիլման, ինչպէս նաեւ հայաստանեան թանգարաններու փորձագէտներու եւ համադրողներու վերապատրաստման ծրագրերուն շուրջ։
