9-րդ գումարման Ազգային ժողովին ընդառաջ՝ Հայաստանի կառավարութիւնը Կիրակի օր հրաժարական պիտի տայ
Հայաստանի Հանրապետութեան կառավարութիւնը այս Կիրակի հրաժարական պիտի տայ։ Գործադիր մարմինի Յուլիս 30-ի նիստին այս մասին յայտարարած է վարչապետ Նիկոլ Փաշինեան։
“Ասիկա մեր կառավարութեան վերջին նիստն է։ 9-րդ գումարման Ազգային ժողովի կազմաւորման առիթով, Հայաստանի Սահմանադրութեամբ նախատեսուած կարգին համաձայն, մենք Կիրակի օրը հրաժարական պիտի տանք, որմէ ետք Հանրապետութեան նախագահը վարչապետ պիտի նշանակէ խորհրդարանական մեծամասնութեան ներկայացուցած թեկնածուն։ Հետեւաբար, այս կազմով մենք կը հանդիպինք վերջին անգամ ըլլալով”,– նշած է Փաշինեան։
Նիստի աւարտին, վարչապետը նաեւ իր շնորհակալութիւնը յայտնած է կառավարութեան անդամներուն՝ անցնող ժամանակահատուածին կատարուած միացեալ աշխատանքին համար։
Ամենայն հայոց կաթողիկոսը չէ հրաւիրուած Ազգային ժողովի անդրանիկ նիստին
Թէեւ Ամենայն հայոց կաթողիկոսին մասնակցութիւնը Ազգային ժողովի անդրանիկ նիստին նախատեսուած է «Ազգային ժողովի կանոնակարգ» սահմանադրական օրէնքով, սակայն այս պահուն տակաւին հրաւէր չկայ։ Այս մասին յայտնած է Մայր Աթոռի տեղեկատուական համակարգի տնօրէն Եսայի քահանայ Արթէնեանը։
Տէր Եսային անպատասխան ձգած է այն հարցումը, թէ արդեօք անցեալին՝ Ամենայն հայոց կաթողիկոսը խորհրդարանի անդրանիկ նիստին չհրաւիրելու նման նախադէպ եղա՞ծ է։ «Եթէ յաւելեալ տեղեկութիւն ըլլայ, կը ծանուցենք»,– ըսած է ան։
Յիշեցնենք, որ 9-րդ գումարման Ազգային ժողովի անդրանիկ նիստը տեղի պիտի ունենայ Օգոստոս 2, ժամը 10-ին։ ■
