Յունուար 28-ին, Վիրահայոց թեմի առաջնորդական տեղապահ Կիրակոս վրդ. Դաւթեանի օրհնութեամբ և աջակցութեամբ, թեմի պատուիրակութիւնը մասնակցած է ՀՀ Տաւուշի մարզի Բերդաւան սահմանամերձ գիւղին մէջ կազմակերպուած Հայոց բանակի 30-ամեակին նուիրուած միջոցառումներուն:
Թիֆլիսի «Հայարտուն» կեդրոնի (ղեկավար՝ Եւգենիա Մարկոսեան) և Բերդաւան համայնքի (հիմնադրամի նախագահ՝ Սմբատ Մուղդուսեան) միջև հաստատուած յարաբերութիւնները աւանդական են, պարուրուած՝ բարեկամութեան, համագործակցութեան, փոխադարձ այցելութիւններու ջերմութեամբ և սիրով: Սակայն այս տարուան այցելութիւնը յուզումնախառն էր, նկատի ունենալով որ ան Հայոց բանակի 30-ամեայ յոբելեանի առիթով հայրենասիրութեան, անձնազոհութեան, տունը պահպանելու, Հայոց բանակը զարգացնելու եւ ամրապնդելու գաղափարներու արտայայտութիւնն էր:
Հայրենիքի սահմանները խիզախօրէն պաշտպանող և պահպանող հերոս բերդաւանցիները, յարգելով Արցախեան 44-օրեայ պատերազմին նահատակուած իրենց հայրենակիցներու լոյս յիշատակը, արարողութիւնը սկսած են յուշահամալիր այցելութեամբ և ծաղիկներ զետեղելով:
Հայրենասիրութեան ոգիով տոգորուած միջոցառումը նուիրուած էր անոնց, որոնք այսօր ալ ուժ, եռանդ և նոյնիսկ կեանք չեն խնայեր հայրենիքի պաշտպանութեան և բանակաշինութեան գործին մէջ: Մշակոյթի տան մէջ տեղի ունեցած համերգին, ներկայացուած են հայրենիքին, հերոսներուն նուիրուած երգեր ու հայկական խրոխտ պարեր: Ձեռնարկը իրենց կատարումներով գեղեցկացուցած են «Հայարտուն» կեդրոնի մենակատար Աիդա Բազոյեան, դուդուկահար Իվանէ Մկրտչեան և «Տարօն» պարի համոյթը:
Գէորգ սարկաւագ Աւետիսեան հաղորդած է Վիրահայոց թեմակալ առաջնորդին օրհնութիւնը և շնորհաւորանքները, նաև մաղթանքները՝ անփորձանք ծառայութիւն Հայոց բանակի բոլոր զինուորականներուն, և ողջ-առողջ վերադարձ՝ նորակոչիկներուն: Միջոցառման ղեկավարները և կազմակերպիչները բարձր գնահատած են Վիրահայոց թեմի պատուիրակութեան այցելութիւնները, որոնք ոգեշնչող են, ուրախացնող և մայր հայրենիքի սահմանները անսասան պահելու պատգամ:
Նոյն օրը ուշ երեկոյեան թեմի պատուիրակութիւնը վերադարձած է Թիֆլիս:
