Արարատ Միրզոյեան՝ Պրիւսէլի մէջ

Միրզոյեան-Քոպաչ

ԱԳ նախարարն ու Եւրոպական խորհրդարանի փոխնախագահը քննարկած են տարածաշրջանի անվտանգութեան հարցեր

Աշխատանքային այցով Պրիւսէլ գտնուող ՀՀ Արտաքին գործոց նախարար Արարատ Միրզոյեան Մայիս 18-ին հանդիպում ունեցած է Եւրոպական խորհրդարանի փոխնախագահ Էվա Քոպաչի հետ։

Զրուցակիցները ընդգծած են ընդհանուր արժէքներու վրայ հիմնուած՝ Հայաստան-ԵՄ գործընկերութեան ընդլայնման ու խորացման կարեւորութիւնը։ Էվա Քոպաչ բարձր  գնահատած է ժողովրդավարական զարգացման նպատակով ՀՀ կառավարութեան ձեռնարկած բարեփոխումները եւ աջակցութիւն յայտնած է անոնց։

Քննարկուած են նաեւ տարածաշրջանային անվտանգութեան խնդիրներ։ Նախարար Միրզոյեան ներկայացուցած է Հայաստանի դիրքորոշումը՝ տարածաշրջանային խաղաղութեան ու կայունութեան հաստատման ուղղուած քայլերու եւ Արցախեան հակամարտութեան համապարփակ եւ մնայուն կարգաւորման վերաբերեալ։

ՀՀ Արտաքին քաղաքական գերատեսչութեան ղեկավարը հանդիպումներ ունեցած է նաեւ Եւրոպական խորհրդարանի շարք մը երեսփոխաններու հետ։

Անոնցմէ Ֆապիօ Մասիմօ Գասթալտոյի հետ հանդիպումին՝ Արարատ Միրզոյեան անոր շնորհած է ՀՀ Արտաքին գործոց նախարարութեան առաջին աստիճանի Պատուոյ շքանշան՝ Հայաստանի ու Եւրոպական Միութեան միջեւ միջխորհրդարանական կապերու ամրապնդման մէջ ունեցած զգալի ներդրումին համար։

Միրզոյեան յարգանքի տուրք մատուցած է Հայոց ցեղասպանութեան զոհերու յիշատակին

Նոյն օրը, նախարար Միրզոյեան յարգանքի տուրք մատուցած եւ ծաղկեպսակ զետեղած է Պրիւսէլի Հանրի Միշօ հրապարակը գտնուող Հայոց ցեղասպանութեան զոհերու յիշատակին նուիրուած խաչքար-կոթողին առջեւ:

Յիշեցնենք, որ յուշակոթողը վերջերս վանդալական արարքի ենթարկուած էր, ապա քաղաքային իշխանութիւններուն կողմէ՝ վերականգնուած։

© 2022 Բոլոր իրաւունքները վերապահուած են