Արցախի մէջ տեղի ունեցած ահաբեկչական արարքին արձագանգած է Ֆրանսայի Արտաքին գործոց նախարարութիւնը՝ յստակօրէն մատնանշելով, թէ Արցախի ոստիկանական կառքը գնդակոծուած է ազերպայճանական ուժերու կողմէ։
«Կը ցաւինք Մարտ 5-ին տեղի ունեցած այդ ծանր միջադէպի զոհերուն համար, երբ Լաչինի միջանցքի մերձակայքին ոստիկաններ փոխադրող կառքը թիրախաւորուած է ազերպայճանական ուժերու կողմէ՝ ռուս խաղաղապահներու պատասխանատւութեան գօտիին մէջ»,– նշուած է Ֆրանսայի Արտաքին գործոց նախարարութեան հրապարակած հաղորդագրութեան մէջ։
Ֆրանսայի Արտաքին քաղաքական գերատեսչութիւնը անհրաժեշտ կը համարէ, որ լոյս սփռուի միջադէպին հետ կապուած բոլոր փաստերուն վրայ։ Փարիզ նաեւ կոչ կ՚ընէ խստօրէն պահպանելու հրադադարը։
