Կը սկսի դիմումներու հաւաքագրումը

Հայաստանի Կրթութեան, գիտութեան, մշակոյթի եւ մարզանքի (ԿԳՄՄ) նախարարութիւնը կը յայտարարէ դիմումներու հաւաքագրում՝ սփիւռքի կրթօճախներուն եւ կրթամշակութային կեդրոններուն ուսումնական գրականութեան եւ օժանդակ նիւթերու տրամադրման տարեկան ծրագրի շրջանակին մէջ:

ԿԳՄՄ նախարարութեան հրապարակած հաղորդագրութիւնը կը նշէ, թէ ծրագրի նպատակն է աջակցիլ սփիւռքի մէջ գործող կրթօճախներուն հայոց լեզուի, գրականութեան եւ հայագիտական այլ առարկաներու դասաւանդման գործընթացին՝ պետական աջակցութեամբ տրամադրելով անհրաժեշտ դասագիրքեր, աշխատանքային տետրեր եւ օժանդակ այլ նիւթեր:

Ծրագրին մասնակցելու համար անհրաժեշտ է՝

• լրացնել տրամադրուող ուսումնական նիւթերու ստացման դիմումը,
• ներկայացնել Հայաստանի ԿԳՄՄ նախարարին ուղղուած պաշտօնական գրութիւն՝ դիմում, ուսումնական նիւթեր ստանալու վերաբերեալ (դիմող կառոյցի ձեւաթուղթով, ստորագրուած եւ կարելիութեան պարագային՝ նաեւ կնքուած),
• պահանջուող իւրաքանչիւր ուսումնական նիւթի «Քանակ» սիւնակին անհրաժեշտ է լրացնել տուեալ ուսումնական նիւթի անհրաժեշտ քանակը:

Եթէ կան ուսումնական նիւթեր, որոնք ցանկին մէջ ներառուած չեն, սակայն կրթօճախները կը փափաքին ստանալ, կրնան զանոնք աւելցնել ցանկի «Լրացուցիչ նիւթեր» սիւնակին մէջ:

Անհրաժեշտ է դիմումները ուղարկել ruzanna.hambardzumyan@escs.am ելեկտրոնային հասցէին մինչեւ 2025 Ապրիլ 10-ը ներառեալ:

Միաժամանակ, ԿԳՄՄ նախարարութենէն կը յայտնեն, որ կը գործէ նաեւ սփիւռքի կրթօճախներուն տրամադրուող ուսումնական գրականութեան ելեկտրոնային պաշարներու հարթակը՝ https://lib.armedu.am/, ուր կարելի է գտնել շարք մը դասագիրքերու եւ օժանդակ նիւթերու ելեկտրոնային տարբերակները՝ ներբեռնման կարելիութեամբ:

Լրացուցիչ հարցերու պարագային՝ կարելի է հեռաձայնել Հայաստանի Կրթութեան, գիտութեան, մշակոյթի եւ մարզանքի նախարարութեան արտաքին կապերու եւ սփիւռքի վարչութեան սփիւռքի հետ կապերու բաժնին (պատասխանատու աշխատակից՝ Ռուզաննա Համբարձումեան, հեռ. +374(10)-599-647)։

Առաջարկուած գրականութեան եւ օժանդակ նիւթերու ցանկերուն տեղեկանալու համար այցելել՝ https://escs.am/am/news/27823