Հայաստանի զբօսաշրջային այցելութիւնները երկու միլիոնը գերազանցած են՝ մօտենալով 2023-ի մրցանիշին

Հայաստան կատարուած զբօսաշրջային այցելութիւններուն թիւը 2026-ի առաջին տասը ամիսներուն հասած է 2 043 531-ի՝ շուրջ 5 առ հարիւր աւելնալով անցեալ տարուան նոյն ժամանակաշրջանին համեմատ։ Զբօսաշրջութեան կոմիտէի Նոյեմբեր 10-ին հրապարակած տուեալներուն համաձայն՝ այս ցուցանիշը ընդամէնը 1751 այցելութիւն պակաս է 2023-ի համապատասխան ժամանակաշրջանին արձանագրուած մրցանիշէն։

Աճը յատկապէս զգալի եղած է Հոկտեմբերին, երբ արձանագրուած է 286 182 զբօսաշրջային այցելութիւն՝ նախորդ տարուան 212 891-ին դիմաց։ Այսպէսով, մէկ տարուան ընթացքին այցելութիւնները 34,4 առ հարիւր աւելցած են։ Հոկտեմբերի այս ցուցանիշը բարձրագոյնն է առնուազն 2019-էն ի վեր։

Այցելուներուն մեծ մասը Ռուսաստանէն է՝ ընդհանուրին 40 առ հարիւրը։ Յաջորդ տեղերը կը գրաւեն Վրաստանը՝ 13 առ հարիւրով, եւ Իրանը՝ 8 առ հարիւրով։

Տարեկան ընդհանուր աճը, սակայն, կը ծածկէ ամսական զգալի տատանումներ։ Յուլիսին եւ Օգոստոսին արձանագրուած անկումներէն ետք, Սեպտեմբերին եւ Հոկտեմբերին զբօսաշրջային այցելութիւնները զգալիօրէն աւելցած են։

Նշենք, որ հրապարակուած վիճակագրութիւնը կը վերաբերի զբօսաշրջային այցելութիւններու թիւին եւ ոչ թէ անպայման տարբեր անձերու։ Միեւնոյն անձը կրնայ հաշուառուիլ մէկէ աւելի անգամ, եթէ նշեալ ժամանակաշրջանին քանի մը այցելութիւն կատարած է Հայաստան։