Եւրոպական խորհրդարանի նոր բանաձեւը՝ ի զօրակցութիւն Հայաստանի եւ արցախահայութեան

Ապրիլ 30-ին, Եւրոպական խորհրդարանը ընդունեց կարեւոր բանաձեւ մը, որ լայնածաւալ աջակցութիւն կը ցուցաբերէ Հայաստանին եւ վճռականօրէն կը պաշտպանէ արցախահայութեան իրաւունքները։

Այս փաստաթուղթը առանձին նախաձեռնութիւն մը չէր, այլ՝ Եւրոպական խորհրդարանի գլխաւոր քաղաքական խմբակցութիւններուն (Աջակողմեան ԵԺԿ-ի, Ընկերվար-ժողովրդավարներու, Պահպանողականներու, Կեդրոնամէտ-ազատականներու եւ Կանաչներու) միացեալ առաջարկը, որուն ստորագրողներու շարքին կը գտնուին այնպիսի ազդեցիկ եւրոերեսփոխաններ, ինչպէս՝ Միրիամ Լեքսմանը, Տէյվիտ ՄըքԱլիսթըրը, Նաթալի Լուազօն, Քաթլին Վան Պրեմփթն ու Մարքեթա Կրեկորովան:

Բանաձեւը վաւերացուած է ճնշող մեծամասնութեամբ. կողմ քուէարկած է 63 երեսփոխան, դէմ՝ ընդամէնը 2, եւ զերօ ձեռնպահ: Նշենք, որ դէմ քուէարկած երկու երեսփոխանները, երկուքն ալ ֆրանսացիներ, կը պատկանին լուսանցքային կամ անկախ խմբաւորումներու, որոնք ընդհանրապէս քննադատաբար կը մօտենան խորհրդարանի մեծամասնութեան որդեգրած գիծին այսօրինակ հարցերու շուրջ (դէմ քուէարկողներէն մէկն է Թիէրի Մարիանին՝ ինքնիշխան աջակողմեաններու «ID» խմբակցութենէն)։ Քուէարկութեան այս արդիւնքը (քուէարկողներուն շուրջ 97 տոկոսը) ցոյց կու տայ խորհրդարանէն ներս տիրող բացառիկ ու լայն համախոհութիւնը բանաձեւին արծարծած հարցերուն շուրջ: Ճիշդ այս համընդհանուր մօտեցումն է, որ խստօրէն զայրացուցած է Պաքուն. այս որոշումը Խորհրդարանի գրեթէ միաձայն կեցուածքն է եւ ո՛չ թէ լուսանցքային կարծիք մը։

Բովանդակային առումով, եւրոպական բարձրագոյն կառոյցը իր քաղաքական եւ ժողովրդավարական զօրակցութիւնը կը յայտնէ Հայաստանի Հանրապետութեան՝ միաժամանակ խստօրէն պահանջելով Ազերպայճանի մէջ ապօրինաբար պահուող հայ գերիներու անյապաղ ազատ արձակումը։ Բանաձեւը յատուկ շեշտադրում կը կատարէ արցախահայութեան ճակատագրին վրայ՝ վերահաստատելով անոնց անվտանգ վերադարձի իրաւունքն ու համապարփակ աջակցութիւն յայտնելով անոնց հիմնական իրաւունքներուն։ Բացի ատկէ, Եւրոպական խորհրդարանը բացայայտօրէն կը դատապարտէ տարածաշրջանէն ներս հայկական մշակութային եւ կրօնական ժառանգութեան ոչնչացման գործընթացը։