Ուրբաթ, Մարտ 14-ին, Պա­նիէօ քա­ղաքի Փօլ Վա­յան-Գու­թիւրիէ սրա­հին մէջ շուրջ երե­սուն հո­գիէ բաղկացած լսարանը մեծ հե­տաքրքրու­թեամբ ունկնդրեց Հիլ­տա Գալ­ֆա­յեան-Փա­նոսեանը, որ կը ներ­կա­յաց­նէր իր «Ար­դարնե­րը Հա­յոց ցե­ղաս­պա­նու­թեան դէմ-յանդիման» ֆրանսերէն գիր­քը (« Les “Justes” face au Génocide des Arméniens »), հրա­տարա­կուած «Գիրք» հրա­տարակ­չա­տան կող­մէ ան­ցեալ Դեկ­տեմբե­րին։ Ներկաներէն մէջ պէտք է նշել պա­րոն Ռո­պէր Օրիւսքո­յի եւ տի­կին Լօռանս Սա­լէօնի բա­րեկա­մական ներ­կա­յու­թիւնը, որոնք հա­մապա­տաս­խա­նաբար Գա­շանի եւ Պա­նիէօյի քա­ղաքա­պետա­րանի խորհրդա­կան­ներն են՝ պա­տաս­խա­նատու՝ Յի­շողու­թեան հար­ցե­րու, ինչպէս նաեւ Պա­նիէօ-Վա­նաձոր քոյր քա­ղաք­նե­րու յանձնա­ժողո­վի եր­կու ներ­կա­յացու­ցիչներ։

Ցե­ղաս­պա­նու­թեան 110-րդ տա­րելիցի նա­խօրեակին, Ֆրան­սա­հայ Կա­պոյտ Խա­չի Պա­նիէօյի «Իսա­հակեան» մաս­նա­ճիւ­ղը կա­րեւոր նկա­տած էր կազ­մա­կեր­պել այս հան­դի­պու­մը՝ բնաբանի մը շուրջ, որ թէեւ ծա­նօթ է, բայց քիչ մշա­կուած է հրա­պարա­կումնե­րու մէջ, այսքան հա­մապար­փակ կեր­պով։ Այս է որ Հիլ­տա Գալ­ֆա­յեան-Փա­նոսեան յա­ջողած է ընել իր գիր­քին մէջ, որ կը ներ­կա­յաց­նէ, բազ­մա­թիւ փաս­տա­թուղթե­րով, երէ­կուան «Ար­դարնե­րը», բո­լոր ազ­գութիւննե­րէ, նե­րառեալ թուրքե­րը, եւ ժա­մանա­կակից «Ար­դարնե­րը», հիմ­նա­կանին մէջ թուրքեր, որոնք չեն վա­րանիր վե­րահաս­տա­տելու Պատ­մա­կան ճշմար­տութիւ­նը՝ իրենց կա­ռավա­րու­թիւննե­րու պաշ­տօ­նական կեղ­ծիքնե­րուն դի­մաց։

Մօտ եր­կու ժամ, այնքան խան­դա­վառ իր նիւ­թով, որուն վրայ աշ­խա­տած էր հինգ տա­րի, Հիլ­տան անդրա­դար­ձաւ այդ «Արդարներուն», եր­բեմն կար­դա­լով հա­տուած­ներ անոնց գրու­թիւննե­րէն կամ յայ­տա­րարու­թիւննե­րէն։

Բա­րեկա­մական հիւ­րա­սիրու­թիւն մը թոյլ տուաւ մաս­նա­կից­նե­րուն աւար­տել երե­կոյթը բա­ժակի մը շուրջ, համ­տե­սելով խա­չու­հի­ներուն պատ­րաստած անու­շե­ղէնները։

ԽԱՉՈՒՀԻ ՄԸ