System of a Down-ի պատմական վերադարձը Փարիզ

80 հազար հանդիսատես շուրջպար բռնեց հայկական աւանդական երգերու հնչիւններուն տակ

Ինը տարուան բացակայութենէ ետք, ամերիկահայ աշխարհահռչակ «System of a Down» ռոք խումբը տպաւորիչ վերադարձ մը կատարեց Ֆրանսա: Հինգշաբթի, Յուլիս 2-ին եւ Շաբաթ, Յուլիս 4-ին, Փարիզի հանրայայտ «Սթատ տը Ֆրանս» մարզադաշտին մէջ, իւրաքանչիւրին՝ 80.000 հանդիսատեսներու ներկայութեամբ, տեղի ունեցան խումբին երկու յաջորդական համերգերը։ Կ՚արժէ նշել, որ երկուքին ալ տոմսերը նախապէս ամբողջութեամբ սպառած էին։ Այս ելոյթը մաս կը կազմէր խումբի եւրոպական շրջագայութեան, որով կը նշուի անոր պատմական «Toxicity» ալպոմի լոյս ընծայման 25-ամեակը։

Սերժ Թանքեանէ, Տարօն Մալաքեանէ, Շաւօ Օտաճեանէ եւ Ճոն Տոլմայեանէ բաղկացած ամերիկահայ քառեակը բառիս բուն իմաստով ցնցեց մարզադաշտը՝ խանդավառ բազմութեան հրամցնելով իր ամէնէն ծանօթ եւ սիրուած կատարումները։

Սակայն երեկոյթներու ամէնէն հզօր եւ յուզիչ պահը արձանագրուեցաւ Տարօն Մալաքեանի առաջնորդութեամբ հնչած հայկական աւանդական «Հէյ ճան, ղափամա» եւ «Աման Թելօ» երգերէն հատուածներու կատարումով։ Այդ պահուն, տասնեակ հազարաւոր օտարազգի եւ հայ հանդիսատեսներ միասնաբար սկսան շուրջպարեր բռնել մարզադաշտին մէջ՝ մեթալ-երաժշտութեան այս բացառիկ ելոյթը Եւրոպայի սրտին մէջ վերածելով հայկական մշակութային ժառանգութեան իսկական տօնախմբութեան մը։

Համառօտ ակնարկ՝ «System of a Down»-ին

«System of a Down»-ը (յաճախ կը կրճատուի որպէս SOAD) համաշխարհային ճանաչում ունեցող ալթերնաթիւ մեթալ եւ հարտ-ռոք խումբ մըն է, որ հիմնուած է 1994-ին, Կլենտէյլի (ԱՄՆ) մէջ։

Խումբը բացառիկ է համաշխարհային երաժշտութեան պատմութեան մէջ այն հանգամանքով, որ անոր բոլոր անդամներն ալ հայ են։

• Սերժ Թանքեան – գլխաւոր մեներգիչ եւ ստեղնաշարային գործիքներու նուագող
• Տարօն Մալաքեան – կիթառահար եւ երկրորդ մեներգիչ
• Շաւօ Օտաճեան – պաս-կիթառահար
• Ճոն Տոլմայեան – թմբկահար

Անոնք աշխարհի տարածքին վաճառած են աւելի քան 40 միլիոն ձայնասկաւառակ եւ արժանացած են հեղինակաւոր «Կրեմմի» (Grammy) մրցանակին։ Անոնց երաժշտութիւնը կ՚առանձնանայ ծանր ռոքի եւ արեւելեան/հայկական աւանդական մեղեդիներու իւրայատուկ միախառնումով։

Բացի երաժշտական նուաճումներէն, խումբին անդամները ծանօթ են որպէս մարդկային իրաւանց պաշտպաններ։ Անոնք իրենց միջազգային հարթակը տասնամեակներ շարունակ օգտագործած են Հայոց Ցեղասպանութեան ճանաչման, Արցախի հարցերը եւ հայ ժողովուրդի արդար իրաւունքները բարձրացնելու համար։