Երեւանի մէջ բացուեցաւ «Եուվենթուս»-ի ակադեմիայի մասնաճիւղը
«Յուվենտուս» ֆուտբոլային ակումբի Ավանի մասնաճյուղի բացման արարողությունը
Երեւանի Աւան վարչական շրջանին մէջ պաշտօնապէս բացուած է իտալական «Եուվենթուս» ֆութպոլի ակումբի ակադեմիայի հայկական մասնաճիւղը։
Բացման արարողութեան ներկայ եղած են Երեւանի քաղաքապետ Տիգրան Աւինեան, Կրթութեան, գիտութեան, մշակոյթի եւ մարզանքի նախարար Ժաննա Անդրէասեան, Հայաստանի Ֆութպոլի դաշնակցութեան (Ֆետերասիոնի) նախագահ Արմէն Մելիքբեկեան, UEFA-ի ընդհ. քարտուղար Թէոտոր Թէոտորիտիս, «Եուվենթուս»-ի ներկայացուցիչներ եւ ակումբի նախկին աստղերէն Ֆապրիցիօ Ռաւանելլին։
Աւանի մարզակեդրոնը ունի խաղադաշտեր, մարզասրահ, բժշկական քննութեան ու վերականգնումի բաժիններ, ինչպէս նաեւ մարզիչներու եւ կարիքաւոր պատանիներու համար կացարան։ Ծրագրին արդէն շուրջ 20 միլիոն տոլարի ներդրում կատարուած է. ներկայիս կը գործեն երկու մարզակեդրոններ՝ Աւանի եւ Կեդրոնի մէջ։
Նոյն օրը Կոտայքի մարզի Նոր Հաճըն համայնքին մէջ տրուած է ակադեմիայի երրորդ մասնաճիւղին եւ մարզական նոր համալիրին շինարարութեան մեկնարկը։
Իշխանութիւններուն համաձայն՝ ասիկա Հայաստանի մէջ եւրոպական մեծ ակումբի առաջին նման ակադեմիան է եւ նպատակ ունի տեղացի մանուկներուն ու պատանիներուն հասանելի դարձնել միջազգային մակարդակի ֆութպոլային պատրաստութիւնը։
