Քոչարեան. «Խաղաղութեան մասին կը խօսին մարդիկ, որոնք…»
Խորհրդարանական ընտրութիւններէն երկուքուկէս ամիս առաջ, քաղաքական ուժերը կը դիրքաւորուին իշխանութեան կողմէ առաջ քաշուած «պատերազմի ուրուական»-ին շուրջ: Մինչ վարչապետ Նիկոլ Փաշինեան կը հաւաստէ, թէ պատերազմի դուռը ամուր փակուած է եւ այժմ խաղաղութիւն հաստատուած է, ընդդիմութիւնը կը պնդէ, թէ նոր պատերազմ չի փափաքիր, այլ կը ձգտի «ուրիշ, աւելի արժանապատիւ խաղաղութեան»։
Բանավէճը սրացաւ, երբ վարչապետ Փաշինեան յայտարարեց, թէ Ռոբերտ Քոչարեանի, Սամուէլ Կարապետեանի եւ Գագիկ Ծառուկեանի ղեկավարած ուժերը կը փորձեն վերանայիլ Հայաստանի եւ Ազերպայճանի միջեւ հաստատուած խաղաղութիւնը: “Այդ ուժերը կը խօսին խաղաղութիւնը վերաբանակցելու եւ ուժային եղանակով պարտադրելու մասին։ Սա ուղղակի կը նշանակէ ոչ միայն դուռը բանալ պատերազմի դիմաց, այլեւ՝ զայն անխուսափելի դարձնել”,– շեշտեց վարչապետը՝ զգուշացնելով, որ ընդդիմութեան յաղթանակի պարագային նոր պատերազմը կրնայ բռնկիլ նոյնիսկ այս աշնան: Ան ընդդիմադիր ուժերը որակեց «օտար երկիրներու գործակալներ» եւ աւելցուց, որ անվտանգութեան երաշխաւորներ փնտռելու անոնց խօսոյթը պարզապէս երկիր օտար խաղաղապահներ մտցնելու փորձ մըն է։
Այս մեղադրանքներուն կոշտ հակադարձեց Հայաստանի երկրորդ նախագահ եւ «Հայաստան» դաշինքի վարչապետի թեկնածու Ռոբերտ Քոչարեան՝ Աշտարակի մէջ քաղաքացիներու հետ ունեցած իր հանդիպումին ընթացքին. “Մեր ժողովուրդին գլխուն երեք պատերազմ բերած մարդը իրաւունք չունի «խաղաղութիւն» բառը գործածելու։ Իմ նախագահութեանս օրօք նոյնիսկ միջին չափի սահմանային միջադէպ չէ արձանագրուած։ Անհեթեթութիւնն ալ չափ ու սահման պէտք է ունենայ”։
Քոչարեանի համոզումով՝ իշխանութիւնը դիտմամբ պատերազմի վախ կը սրսկէ ժողովուրդին՝ քուէներ կորզելու նպատակով: “Սա ամէնէն վտանգաւոր եւ ամէնէն ստորնացուցիչ թեզն է. ժողովուրդին գլխուն Ալիեւով սարսափ կը ստեղծեն”,– նշեց ան: Երկրորդ նախագահը ընդգծեց, որ ամէն ինչ պէտք է ընել նոր պատերազմէ խուսափելու համար, սակայն այդ չի նշանակեր խաղաղութիւն մուրալ միակողմանի զիջումներով, այլ՝ կը պահանջէ արժանապատիւ դիւանագիտութիւն եւ երաշխաւորուած խաղաղութիւն: Անոր կարծիքով, Փաշինեան չի փնտռեր խաղաղութեան իսկական երաշխիքներ, քանի կ՚ուզէ, որ այդ խաղաղութիւնը կապուած ըլլայ բացառապէս իր անուան եւ իշխանութեան պահպանման հետ:
Անդրադառնալով Արցախի մէջ ռուս խաղաղապահներու կրաւորականութեան մասին Փաշինեանի քննադատութեան, Քոչարեան պարզաբանեց. “Խնդիրը այն չէ, որ երաշխաւորները չեն գործած, այլ այն՝ որ Փաշինեան ինք խախտած է համաձայնութիւնները: Երբ Հայաստանը Արցախը ճանչցաւ որպէս Ազերպայճանի մաս, Արցախը Պաքուի համար դարձաւ անջատողական միաւոր, իսկ Պաշտպանութեան բանակը՝ ահաբեկչական ստորաբաժանում, իր բոլոր ծանր հետեւանքներով”։
