Լոնտոնի սրտին մէջ գտնուող աշխարհահռչակ խուզարկու Շերլոք Հոլմսի տուն-թանգարանին պատմութիւնը սերտօրէն կապուած է հայկական անունի մը՝ Կրէյս Էյտինեանցի (Grace Aidiniantz) հետ։
Կրէյս Էյտինեանց ծնած է 1927 Օգոստոս 24-ին, Լոնտոն։ Զաւակն էր Հայոց ցեղասպանութեան հետեւանքով Օսմանեան կայսրութենէն Ռուսաստան, հոնկէ ալ Մեծն Բրիտանիա գաղթած հայ ընտանիքի մը։
1990-ին, երեք զաւակներու մայր եւ Արթուր Քոնան Տոյլի ստեղծագործութիւններու երկրպագու Կրէյսը համարձակ քայլի մը դիմեց։ Ան վաճառեց իր սեփական բնակարանը եւ ամբողջ գումարը ներդրաւ Պեյքըր փողոցին (Baker Street) վրայ գտնուող շէնքի մը գնման մէջ։ Թէեւ շէնքը կը կրէր 239 թիւը, Կրէյս եւ անոր որդին՝ Ճոն Էյտինեանց, յաջողեցան զայն պաշտօնապէս արձանագրել իբրեւ հանրածանօթ «221B» հասցէն, ուր ըստ վէպերուն՝ 1881-1904 թուականներուն ապրած են Շերլոք Հոլմսն ու Տոքթ. Ուաթսընը։
1815-ին կառուցուած այս շէնքը, հակառակ անոր որ յօրինուած կերպարի մը բնակարանն է, կառավարութեան կողմէ ճանչցուած է իբրեւ ճարտարապետական եւ պատմական արժէք ներկայացնող կառոյց։ Թանգարանը անմիջապէս մեծ ժողովրդականութիւն վայելեց՝ գրաւելով հազարաւոր զբօսաշրջիկներ եւ ընտանիքին ապահովելով մեծ հարստութիւն (մօտ 20 միլիոն փաունտ սթերլինկ)։
Սակայն, Կրէյս Էյտինեանցի կեանքը ունեցաւ ողբերգական աւարտ մը։ Ան մահացաւ 2015 Նոյեմբեր 28-ին, ծերանոցի մը մէջ, 88 տարեկանին։ Ըստ մամլոյ հրապարակումներուն, ան հեռացաւ կեանքէն «սիրտը կոտրած»՝ ականատես ըլլալով իր զաւակներուն (որդւոյն՝ Ճոնի եւ երկու դուստրերուն) միջեւ ծագած դաժան ֆինանսական եւ իրաւական վէճերուն, որոնք կը վերաբերէին թանգարանի սեփականութեան եւ եկամուտներուն։
Յատկանշական է, որ Կրէյս Էյտինեանց երկար տարիներ եղած է նաեւ Լոնտոնի «Aid Armenia International» բարեսիրական կազմակերպութեան տնօրէնը՝ ջանալով աջակցիլ հայ ժողովուրդին եւ աշխարհին ներկայացնել Հայաստանի պատմութիւնը։ Այսօր անոր գործը կը շարունակէ որդին՝ Ճոն Էյտինեանց։
