Փետրուար 15-ին, դեսպան Վարուժան Ներսէսեան Գարտիֆի մէջ մասնակցած է յուշատախտակի մը բացման արարողութեան, որ կը պատուէ անոնք որոնք նշանակալից դեր ունեցած են Կալլէսի կառավարութեան կողմէ Հայոց ցեղասպանութեան ճանաչման եւ պատմական արդարութեան պաշտպանութեան ուղղուած աշխատանքներուն մէջ:

Հայկական Համայնքային խորհուրդի կազմակերպած ձեռնարկը տեղի ունեցած է Գարտիֆի Խաղաղութեան տաճարին մէջ, ուր կը գտնուի Միացեալ Թագաւորութեան հանրային տարածքին վրայ զետեղուած առաջին Հայոց ցեղասպանութեան յուշարձանը:

Իր ելոյթին դեսպան Ներսէսեան ընդգծած է պատմական յիշողութեան պահպանման եւ ցեղասպանութեան ու մարդկութեան դէմ ուղղուած ոճիրներու արգիլման ջանքերու ամրապնդման կարեւորութիւնը: Ան անդրադարձած է՝ Հայաստանի շարունակական յանձնառութեան՝ միջազգային գործընկերներու հետ աշխատելու ցեղասպանութեան կանխումի ենթակառոյցները հզօրացնելու, մարդկութեան դէմ ոճիրներու մասին դաստիարակութիւնը խթանելու եւ արդարութիւնն ու հաշուետւութիւնը պահպանելու ուղղութեամբ:

Դեսպանը անդրադարձած է նաեւ Հայաստանի եւ Կալլէսի միջեւ կապին, նշելով թէ այս միութիւնը կը խորհրդանշուի Գարտիֆի մէջ գտնուող խաչքարով, որ պատրաստուած է վարդագոյն աւազաքարէ, որ կը նմանի հայկական տուֆին, իսկ միւս բաղադրիչը՝ կալլէսական թերթաքարն է:

Պարոն Ներսէսեան շեշտած է Հայաստանի հետ բարեկամութեան՝ բազմակուսակցական  խորհրդարանական խումբին դերը,– որուն նախագահն է երեսփոխան Ճեսիքա Մորտըն,– որ կը հետապնդէ Հայաստանի եւ Միացեալ Թագաւորութեան միջեւ սերտ յարաբերութիւններու զարգացման նպատակ:

Ձեռնարկին ներկայ եղած են Գարտիֆի քաղաքապետուհի Հելըն Լոյտ Ճոնզ, երեսփոխաններ՝ Ճեսիքա Մորտըն եւ Ճենի Ռեթպոն, ինչպէս նաեւ Կալլէսի հայ համայնքի անդամներ: